Quanzhou prezerva patrimóniu hahú husi uma tradisionál sira no ponte ida ho tinan 800

QUANZHOU (XIN), 22 setembru 2026 (TATOLI) – Husi uma tradisionál sira ne’ebé prezerva vestíjiu moris nian iha súl Fujian nian to’o ponte fatuk ida ho tinan liu 800, delegasaun mídia husi nasaun ASEAN sira esplora patrimóniu istóriku, kulturál no arkitetóniku Quanzhouan, Provínsia Fujian, Xina.

Viajen ne’e hahú hafoin delegasaun konklui vizita dadeer ida bá sede Grupu ANTA nian iha Jinjiang. Hafoin ne’e grupu ne’e kontinua ba Bloku Tradisionál Wudianshi iha Jinjiang, área istórika ida ne’ebé prezerva estrutura oioin husi Dinastia Ming no Qing, períodu Repúblika Xina no era modernu.

Iha Wudianshi, jornalista sira observa oinsá arkitetura tradisionál la’ós serve de’it hanesan hela-fatin, maibé mós reflete moris sosiál, kultura, no estatutu sosiál komunidade iha tempu ne’ebá.

Aspetu oioin husi uma nia dezeñu, inklui kuartu sira, área hemu xá no form edifísiu sira, iha funsaun no signifikadu espesífiku. Delegasaun ne’e mós observa diferensa entre uma sira husi família riku sira no edifísiu sira ne’ebé asosiadu ho ofisiál Governu pasadu sira, no mós elementu oioin husi arkitetura tradisionál xineza.

Karaterístika ida ne’ebé marka Wudianshi maka kolesaun edifísiu sira ho tijolu mea no estilu palásiu, ne’ebé komún iha súl Fujian nian. Iha área ne’e iha edifísiu sira ne’ebé kahur element xinés no osidentál, ne’ebé reflete istória troka kulturál no relasaun entre ema sira Fujian nian no mundu esternu.

Bloku Tradisionál Wudianshi rekoñese hanesan área urbana istórika iha Jinjiang. Lokaliza iha subdistritu Meiling, Jinjiang, iha administrasaun sidade Quanzhou nian okos, área ne’e kobre maizumenus metru kuadradu 84.000.

Estrutura besik 130 prezerva ona iha fatin ne’e, inklui salaun bei’ala sira-nian, templu, rezidénsia sira, no loja sira. Aleinde patrimónia fíziku, Wudianshi prezerva patrimóniu kulturál intanjivel, hanesan Ópera Gaojia, arte boneka, no múzika Nanyin.

Lasu sira entre ema sira Fujian nian no komunidade xineza sira iha rai-li’ur mós sai evidente iha edifísiu oioin iha área ne’e. Kultura relijioza ne’ebé asosiadu ho Templu Shigu habelar ona to’o Filipina no Taiwan, enkuantu Salaun Ancestral Klan Cai no Salaun Ancestral Klan Zhuang sai hanesan ligasaun ba relasaun parentesku ho komunidade xineza iha rai-li’ur.

Revitalizasaun Wudianshi hanesan distritu kulturál no turizmu hahú iha Abríl 2012, no área ne’e loke ba públiku iha Maiu 2015. Iha Setembru tinan hanesan, Wudianshi hetan dezignasaun hanesan atrasaun turístiku nasionál 4A iha Xina.

Prezervasaun patrimóniku kulturál mós hala’o liuhusi atividade arte no kulturál. Durante 2024, liu atuasaun 400 ne’ebé hatudu patrimóniu kulturál intanjivel hala’o iha área ne’e.

Iha Janeiru 2025, Bloku Tendénsia Nasionál loke iha Wudianshi  ho marka oioin, inklui ANTA no Xtep ne’ebé kahur patrimóniu kulturál tradisionál ho dezenvolvimentu industriál no estilu moris modernu Jinjiang nian.

Ponte fatuk ida ho tinan liu sékulu ualu

Hafoin konklui vizita bá Wudianshi no han meiudia, delegasaun ne’e kontinua bá Ponte Anping, ne’ebé mós koñesidu hanesan Ponte Wuli. Iha fatin ne’e, grupu uza veíkulu tolu hodi vizita parke no haree Ponte Anping ho matan rasik husi ángulu oioin. Estrutura ponte nia kaptura atensaun delegasaun tanba konstrusaun ne’e uza viga fatuk granitu boot.

Konstrusaun Ponte Anping hahú iha tinan 1138, durante Dinastia Song Súl nian, ho luan maizumenus metru 2.255 no ho idade liu sékulu ualu, rekoñese hanesan ponte ida husi ponte antigu ne’ebé sei prezerva iha Xina.

Téknika konstrusaun ponte nian hatudu kapasidade enjeñaria sosiedade iha era ne’ebá. Bloku granitu boot sira uza hodi forma estrutura ponte nian, lahó depende ba materiál konstrusaun modernu hanesan simentu ka besi.

Aleinde valór arkitetóniku, Ponte Anping mós iha signifikadu istóriku ba dezenvolvimentu transporte no komérsiu marítimu iha Quanzhou, liuliu durante Dinastia Song no Yuan, bainhira rejiaun ne’e dezenvolve sai sentru importante ba komérsiu marítimu.

Ponte Anping maka ida husi fatin komponente 22 iha sítio “Quanzhou: Emporium of the World in Song-Yuan China”, ne’ebé inskritu iha Lista Patrimóniu Mundiál UNESCO iha 2021.

Vizita bá Wudianshi no Ponte Anping hatudu dimensaun rua husi patrimóniu Quanzhou. Wudianshi fó imajen kona-ba moris komunidade no kultura tradisionál liuhusi uma, templu, salaun bei’ala, arte no tradisaun sira, enkuantu Ponte Anping hatudu kapasidade konstrusaun no dezenvolvimentu infraestrutura husi sosiedade iha sékulu liubá.

Vizita bá Ponte ng marka konkluzaun itineráriu delegasaun mídia ASEAN iha Quanzhou. Husi área ne’e, delegasaun sai hosi Quanzhou ba Xiamen, viajen maizumenus oras ida no minutu 30 liuhosi estrada, hodi kontinua série Workshop Media ASEAN iha Provínsia Fujian.

Jornalista: Arminda Fonseca 

Editora: Maria Auxiliadora