Timor GAP-PetroTim selebra kontratu operasaun konjunta ba esplorasaun petrolífera
DILI, 25 Setembru 2026 (TATOLI) –
Timor GAP, E.P. no kompañia PetroTim Resources S.A. selebra akordu kona-ba Joint Operating Agreement (JOA) ba Production Sharing Contract (PSC) ho naran TL-OT-25-24.OA ba bloku B iha área rai-maran (onshore) nian iha parte Bobonaru, Ainaru, Ermera no Kovalima.
Timor GAP Onshore Block B Unipessoal Lda., subsidiária husi Timor GAP E.P. no PetroTim asina akordu ne’e hodi formaliza enkuadramentu operasaun entre parte rua no estabelese baze ba implementasaun PSC ne’e.
Tuir PSC ne’e, PetroTim iha interese partisipasaun 70% no hala’o papél hanesan operadór, enkuantu Timor GAP iha interese partisipasaun 30%.
PSC TL-OT-25-24 kobre área sira neʼebé lokaliza prinsipalmente iha munisípiu Bobonaru no Ainaru, ho área adisionál sira ne’ebé estende ba Ermera, liuliu iha Atsabe, no mós ba parte balun husi Kovalima.
Asinatura ne’e reprezenta marku importante ida iha avansu parseria entre parte rua. Akordu ne’e estabelese enkuadramentu kontratuaá ba parte sira atu koordena no implementa atividade sira tuir PSC, inklui faze tuirmai husi atividade esplorasaun.
Akordu ne’e mós fornese baze estruturadu ida ba kooperasaun entre parte sira ne’ebé iha interese partisipasaun, enkuantu kontinua ho implementasaun PSC tuir enkuadramentu kontratuál no regulatóriu neʼebé aplika iha Repúblika Demokrátika Timor-Leste.
Asinatura ne’e mós reflete kompromisu parte sira nian atu avansa programa serbisu PSC TL-OT-25-24 liuhusi enkuadramentu operasaun ne’ebé klaru, no atu suporta kontinuidade atividade esplorasaun no avaliasaun ba área kontratu ne’e.
Prezidente Timor GAP, Rui Maria Alves, hatete asinatura akordu ne’e hodi parseiru rua bele iha serbisu implementa projetu sira hamutuk.
Aleinde akordu ne’e mak regula relasaun entre parte rua iha parseria joint venture ida-ne’e.
“Atividade ne’ebé hala’o iha PSC ne’ebé asina ona antes iha ne’ebá tau kedas kompromisu ami tenke halo”, nia hatete hafoin asina akordu hamutuk ho PetroTim Resources S.A, iha Timor Plaza, sesta-feira ne’e.
Iha fatin hanesan, Diretór Empeza PetroTim, Tim Lay, hatete serbisu barak antes ne’e Timor GAP hala’o ona. Ho asinatura ne’e, iha fulan-Outubru tinan ne’e empreza sei hahú ho atividade peskiza.
“Ita kontinua ba oin, halo peskiza foti rai, fatuk ne’e ba estudu de’it seidauk halo sízmiku, no peskiza ne’e bele to’o tinan ida ka rua depende. Depois halo estudu analiza ne’e mak sei lori tempu, más ami tenke aselera, tanba Timór presiza avansa iha área ne’e”, nia afirma.
Operadór sei hala’o atividade sira ne’ebé akompaña husi Timor GAP tuir de’it regulamentu husi Autoridade Nasionál Petróleu (ANP) nian.
Nia dehan empreza nu’udar operadora responsavel iha tékniku no finanseiru iha faze dahuluk hahú gasta orsamentu to’o millaun $3.
Tuir Tim Lay, investimentu ne’e risku no sempre iha kompañia tuir akordu no Timor GAP laiha responsavel ba orsamentu.
Jornalista: Nelson de Sousa
Editora: Maria Auxiliadora
