Kopa Sub-17 Bobonaru sai dalan dezenvolve jerasaun futeból foun
BOBONARU, 26 Setembru 2026 (TATOLI)--Federasaun Futeból Timor-Leste (FFTL) konsidera Kopa Juvenil Sub-17 iha Munisípiu Bobonaru nu’udar parte husi esforsu atu dezenvolve futeból no prepara jerasaun jogadór foun ba futeból Timor-Leste.
Diretór Kompetisaun FFTL, João Campos, hateten, kompetisaun ne’e la’ós de’it prioridade federasaun nasionál, maibé mós apoiu husi Federasaun Internasionál Futeból (FIFA) no Konfederasaun Futeból Ázia (AFC), ne’ebé fó atensaun ba dezenvolvimentu futeból husi baze.
“Kompetisaun ne’e realiza atu kontribui ba dezenvolvimentu futeból iha Timor-Leste. Ita hahú husi kiik-oan tanba husi ne’e mak ita bele hetan fini ba futuru no forma jerasaun kontinuadór,” João Campos dehan iha abertura kompetisaun iha Estádiu Malibaka, Sábadu ne’e.
Notísia relevante : Kopa Juvenil Sub-17 2026 hahú ho espirítu foun ba futuru futeból TL
Nia mós husu ba jogadór sira atu aproveita oportunidade ne’e hodi hatudu sira-nia talentu no prestasaun tanba kompetisaun sei kontinua ba nível rejionál no nasionál.
“Maliana mak sei sai uma-nain ba tinan ida-ne’e, nune’e mós sei ba iha nasionál, ha’u hatene Maliana, Bobonaru nia jogador barak kontribui ba selesaun nasionál, iha tinan kotuk mós jogadór ne’ebé joga iha kompetisaun hanesan hetan oportunidade sai ba li’ur hodi reforsa selesaun nasionál, ita agradese ba asosiasaun Bobonaru,” nia akresenta.
Prezidente Asosiasaun Futeból Bobonaru (AFB), Marçal dos Santos, konsidera kompetisaun ne’e importante atu identifika jogadór sira ne’ebé iha talentu no prestasaun di’ak, atu nune’e bele hetan oportunidade tama iha ekipa selesaun futeból nasionál.
“Hatudu imi nia talentu ne’e ba para nune’e ita Munisípiu Bobonaru mós bele enkaixa-an iha ekipa selesaun nasionál nia, husu mós ba arbritrajen sira atu lidera jogu ne’e ho matenek ne’ebé imi iha ona atu nune’e jogu ne’e bele di’ak no kualidade,” nia hameno.
Prezidente Autoridade Munisípiu Bobonaru, Paulo Moniz Maia, hato’o apresiasaun ba Komisaun Organizadora AFB ne’ebé kontinua organiza kompetisaun futeból ba kategoría oioin, hahú husi Sub-19, Sub-Livre no agora Sub-17.
“Ha’u sei haruka komisaun foti imi nia naran, jogadór sira ne’ebé joga di’ak, atu tau-hamutuk forma ekipa Bobonaru ida hodi kompete ho munisípiu sira seluk,” Paulo Moniz Maia, hato’o.
Kopa Juvenil Sub-17 iha Bobonaru partisipa husi klubu mane na’in-sia no klubu feto na’in-haat, ne’ebé sei hadau malu kompetisaun atu hatudu sira-nia kapasidade no talentu iha futeból.
Jornalista : Sergio da Cruz
Editora : Julia Chatarina
