Ahi han uma ida iha Molop, vítima la konsege salva sasán
BOBONARU, 28 Setembru 2026(TATOLI) – Iha segunda-feira ne’e, pur volta tuku 09h45, akontese ahi han mutuk uma ida iha suku Molop, postu administrativu Bobonaru, munisípiu Bobonaru, ne’ebé halo família vítima la konsege salva sasán hotu.
Xefe Suku Molop, António Maia, informa katak to’o agora seidauk hatene kauza husi akontesimentu ne’e tanba uma-na’in laiha fatin.
“Uma-na’in bá to’os, entaun haree husi to’os ahi han uma ne’e su’ar sa’e maka’as. Nia [uma-na’in] halai mai duni tanba to’os dook uitoan, parese kilómetru 2. Entaun, mai to’o uma motuk tiha ona, kalen mós rabat tiha ba rai. Ha’u husu informasaun ba uma-na’in dehan katak dadeer ne’e la sunu ahi”, António Maia relata ba Tatoli via telefone.
Autoridade suku ne’e dehan akontesimentu ida-ne’e lori tristeza boot ba família vítima tanba dokumentus importante, osan hamutuk $400, inklui ai-han mutuk hotu.
“Família ne’e halo to’os maka’as. Sira-nia batar bidon rua, fore-tali bidon ida, ai-farina karon 10, no manu. Sira, inklui inan-aman no oan sira hamutuk ema na’in-11, nia dokumentus ahi han hotu”, nia dehan.
Hafoin inséndiu ne’e, líder komunitáriu hato’o kedas ba Autoridade Protesaun Sivíl no Diresaun Servisu Munisipál Jestaun Risku Dezastre, Autoridade Munisípiu Bobonaru, atu fó apoiu emerjénsia hodi hakmaan vitíma sira-nia sofrementu ba loron balun nian.
Komandante APC Munisípiu Bobonaru, Zeca Michael, konfirma katak ekipa APC no Diresaun Servisu Munisipál Protesaun Sivíl dezloka ona bá fatin akontesimentu.
“Ita nia ekipa iha tuku 11 ne’e dezloka ona bá Molop, lori apoiu emerjénsia, hodi tulun vítima inséndiu para atende sira-nia nesesidade ba loron balun nian. Ita-nia ekipa mós sei halo verfikasaun ba danus ne’e tama kategoria saida. Se estragu totál ita sei hato’o ba nasionál para bele konsidera atu hetan apoia rekuperasaun”, nia informa.
Notísia relevante: Inséndiu destrui uma ida iha Holsa, família lakon sasán hotu
Jornalista: Sergio da Cruz
Editora: Maria Auxiliadora
