Inséndiu destrui uma ida iha Holsa, família lakon sasán hotu
BOBONARU, 26 Agostu 2026 (TATOLI) – Inséndiu destrui uma ida iha suku Holsa, postu administrativu Maliana, munisípiu Bobonaru, no halo família vítima na’in-lima lakon sira-nia sasán hotu, tanba hela de’it sira ho ropa iha isin-lolon.
Ahi han uma ne’e akontese iha tersa-feira kalan pur volta tuku 20h00, bainhira uma-nain laiha fatin.
“Ha’u tunu sate hela iha oin, de repente ema halai sa’e hotu mai, ha’u mós hakfodak halai bá haree uma nia kantu ne’e, ahi han uma, ha’u dehan de’it ai…Maromak, ha’u nia uma-ahi han tiha ona. Ha’u la hatene ahi ne’e sa’e husi ne’ebé, tanba bainhira ha’u haree, ahi nakonu hotu ona uma-laran. Sasán ida mós la konsege salva, salva de’it ami-nia isin-lolon”, Vítima Noviana Cardoso ho matan-been relata ba jornalista sira, ohin.
“Ha’u sente triste tebes tanba lakon buat hotu. Agora hela de’it ami ho roupa iha isin de’it. Agradese tanba APC bele mai apoia ona ami, para sustenta ami-nia vida ba loron balun nia”, nia hato’o.
Komandante Bombeiru Munisípiu Bobonaru, Eusébio Fernandes, konfirma katak hafoin akontese inséndiu, sira bá kedas terrenu atu kombate ahi han ne’e, maibé la konsege tanba lakan maka’as liu.
“Ami hetan kontaktu husi família sira, ami mai iha fatin maibé tarde liu iha informasaun, tanba vítima sira pániku ho ida ne’e buka ami-nia nomor la hetan. Sira neʼebé kotaktu ami ne’e viziñu sira, ami konsege mai pur volta minutu lima hanesan ne’e, mai la konsege salva tanba ahi domina tiha uma-laran”, nia dehan.
APC Munisípiu Bobonaru serbisu hamutuk ho Diresaun Servisu Munisipál Protesaun Sivíl no Jestaun Risku Dezastre, Autoridade Munisípiu Bobonaru, hodi fó apoiu emerjénsia hanesan pakote ai-han no nesesidade bázika seluk ba família vítima. Aleinde ne’e, ekipa halo levantamentu no avaliasaun kona-ba estragu ne’ebé akontese.
Komandante hatete katak depoizde avaliasaun, ekipa sei klasifika dezastre ne’e tuir nia nivel, atu determina tipu apoiu rekuperasaun ne’ebé vítima sira bele hetan.
Vítima sira sei hetan apoiu tuir prosesu no direitu ne’ebé eziste no durante períodu provizóriu APC rekomenda família vítima atu hela hamutuk ho parente ne’ebé besik hodi hein apoiu seluk ne’ebé sei mai.
Notisía relevante: APC Bobonaru rejista dezastre naturál 172 durante Janeiru-Jullu
“Sasan ne’e atu mai sedu ha’u hanoin seidauk bele, tanba presiza prienxe prosesu lubuk ida. Ita husu vítima atu pasiénsia uitoan hodi hein”, katak.
APC apela ba komunidade atu tau prioridade ba seguransa no salva uluk vida bainhira dezastre akontese, tanba rikusoin bele substitui, maibé vida ema nian labele filafali.
“Dezastre mai ita la espera. Estadu iha obrigasaun atu ajuda, maibé importante mak ita tenke salva uluk ita-nia vida, tanba vida ne’e Estadu sei la fó fila, sasán Estadu bele fó”, nia dehan.
Daudaun ne’e, família afetada hela provizoriu ho parente sira ne’ebé besik.
Notísia relevante: APC apoia materiál rekuperasaun ba vítima dezastre naturál 87 iha Bobonaru
Jornalista: Sergio da Cruz
Editora: Maria Auxiliadora
