Governu entrega ona projetu Memoriál Santa Krús ba Komité 12 Novembru
DILI, 30 Setembru 2026 (TATOLI)–Ministru Asuntu Kombatente Libertasaun Nasionál, Gil da Costa Monteiro “Oan-Soru”, hateten prosesu kona-ba projetu Memoriál Santa Krús Governu liuhusi Ministériu Asuntu Kombatente Libertasaun Nasionál (MAKLN) entrega ona ba Komité 12 Novembru atu kontinua prosesa tuir faze sira-ne’ebé iha.
Tan ne’e, nia esplika, prosesu finalizasaun projetu Memoriál Santa Krús, inklui mudansa ba fatin Saudozu Sebastião Gomes nian sei kontinua hela liuhosi kooperasaun ho Komité 12 Novembru.
Kona-ba bainhira mak konkursu foun ba projetu ne’e sei lansa, tuir nia, autoridade relevante seidauk bele konfirma data definitiva tanba dokumentu finál seidauk disponivel atu fó-sai ba públiku.
Notísia relevante: Konstrusaun Memoriál Santa Krús demoradu, K12N prefere buka kompañia foun
“Dokumentu definitivu ida seidauk iha. Ha’u lahatete ba públiku dehan bainhira,” Oan-Soru dehan iha Palásiu Governu, Kuarta ne’e.
Kona-ba planu muda Saudozu Sebastião Gomes nia rate bá fatin seluk, governante ne’e hatán, prosesu ne’e sei la’o hela no agora iha Komité 12 Novembru nia responsabilidade.
Nia mós hateten katak ministériu relevante asina ona akordu ho Prezidente Komité 12 Novembru iha 3 fulan-Agostu 2026, no agora prosesu tama ona ba faze tuirmai.
Nune’e, Oan Soru tenik, bainhira mak konkursu foun sei hahú no bainhira mak projetu Memoriál Santa Krús bele finaliza, sei depende ba prosesu dokumentasaun no desizaun hosi Komité 12 Novembru.
Jornalista: Osória Marques
Editór: Xisto Freitas da Piedade
