BTL planeia transforma sistema bee-moos rurál ba urbanu iha Bobonaru no Atabae
BOBONARU, 02 Outubru 2026 (TATOLI)-Bee Timor-Leste, Empreza Públika (BTL, EP) Munisípiu Bobonaru planeia atu transforma sistema bee-moos rurál ba sistema urbanu iha postu administrativu Bobonaru no Atabae iha 2027.
Koordenadór BTL, E.P Munisípiu Bobonaru, Adriano da Cruz, hatete katak transformasaun sistema bee-moos ne’e sei kontinua tuir programa nasionál atu hadi’a no hametin jestaun distribuisaun bee-moos ba komunidade.
“Agora, ita halo ona melloramentu sistema bee-moos iha kapitál Maliana, Kailaku, Lolotoe no Balibó. Projetu sira iha Kailaku, Lolotoe no Balibó la’o hela, enkuantu Bobonaru no Atabae sei tama iha planu tuir disponibilidade orsamentu iha 2027 ka 2028, maibé kle’ur ou lais BTL sei tranforma hotu”, Adriano da Cruz dehan.
Nia hatete katak sistema bee-moos iha postu rua ne’e eziste ona, maibé dezafiu boot mak iha área jestaun no distribuisaun bee ba komunidade. Ezemplu, sistema bee-moos Tapó, ne’ebé komunidade iha Tuluata no área sira seluk dalabarak la hetan bee, tanba jestaun tanki rezervatóriu iha Oe-leu seidauk hala’o ho efetivu.
“Tanki rezervatoriu iha Oe-leu ne’e atu uza hanesan tanki atu rai bee hodi akumula bee, nakonu tiha mak foin distribui. Ita konsidera tanki ne’e hanesan rezervatoriu, maibé to’o ikus ema ne’ebé halo jestaun provizóriu iha ne’ebá la jere hanesan ne’e, sira konsidera hanesan tanki pasajen ida, tanba ne’e mak ema barak la hetan bee hanesan Ai-Asa, Tuluata, sá tan iha Lourba no Ilat-laun”, nia dehan.
Adriano afirma bainhira BTL implementa projetu ne’e katak sistema sira sei uza hotu metru kontadór ne’ebé empreza estatál ne’e rasik mak halo jestaun no emprega traballadór sira atu asegura bee loroloron ba kliente sira.
Iha sorin seluk, komunidade Bobonaru, Lúcia Moniz, espera BTL bele implementa planu transformasaun sistema bee-moos tanba durante ne’e problema distribuisaun bee sei mosu tanba pipa sira dalaruma ema sobu no muda tuir nesesidade rasik.
“Pipa sira sa’e ba ne’e ema idaidak ba sobu tuir sira-nia hakarak, hasai bee arbiru iha dalan-dalan ne’e mak ami sira iha parte rohan mai ne’e la hetan bee. Tempu bailoro hanesan ne’e susar los. Se projetu ne’e tama ona, entaun pipa sira ne’e troka foun hotu, bee la’o lancar ona, tanba ema kontrola nia iha, ema ida la uza konforme ninia hakarak”, nia dehan.
Tuir dadus, BTL, E.P instala ona metru kontadór 1.800-resin kobre postu administrativu Maliana, Kailaku, Lolotoe no Balibó.
Notísia relevante: To’o trimestre daruak, BTL Bobonaru halibur reseita liu rihun $18
Jornalista: Sergio da Cruz
Editora: Maria Auxiliadora
