Ekipa Kontener Tais introdús atividade ba Sekretáriu Estadu Expedito
DILI, 02 Outubru 2026 (TATOLI)–Fundadór Kontener Tais, Natalino Fernandes Ximenes hamutuk ho nia ekipa, Sesta ne’e, hasoru-malu ho Sekretáriu Estadu Komunikasaun Sosiál, Expedito Dias Ximenes, iha Gabinete, Palásiu Governu, ho objetivu atu introdús inisiativa harii Kontener Tais ne’ebé kontribui ba setór kulturál iha Timor-Leste.
“Iha tinan 2023 ami hetan oportunidade bá Portugál, fila mai ami manán fundu ida bolu naran Pro-Cultura hodi inisiativa ami harii Kontener Tais ne’ebé nia sede iha Fomentu besik Eskola IOB,” nia informa hafoin enkontru, Sesta ne’e.
Aleinde espasu, sira mós harii plataforma dijitál ida hanaran Timor Creative ne’ebé sai hanesan baze dadus ba artista sira.
“Ami-nia espasu fíziku ida iha tia mak ami halo fali plataforma dijitál ida bolu naran Timor Creative, ne’ebé mak sai hanesan baze dadus ida ba artista sira, iha kanta, dansa, filme inklui mós kontíudu kreatór,” nia akresenta.
Notísia relevante : MKI fasilita soru-na’in Bobonaru prodús kór naturál 39 ba haburas tais lokál
Asosiasaun ne’e introdús atividade ba Sekretáriu Estadu tanba sira-nia serbisu iha ligasaun ho Sekretaria Estadu Komunikasaun Sosiál (SEKOMS), nune’e iha futuru bele serbisu hamutuk.
Kontener Tais ne’e hanesan espasu multiuzu ida ho kontentór haat ho dezeñu tais. Kontentór haat ne’e utiliza ba palku konsertu, estúdiu múzika, fatin formasaun no ar livre ba estudante sira bele utiliza hanesan biblioteka tanba tau livru balun ne’ebé apoia husi Institutu Camões.
“Uluk laiha espasu, agora iha ona espasu ho objetivu atu loke ba públiku, sé mak hakarak promove sira-nia talentu bele ba ami-nia fatin tanba iha mós estúdiu no formasaun kona-ba kulturál,” nia katak.
Iha enkontru ne’e, sira husu Governu atu apoiu plataforma dijitál ne’ebé foin la’o no presiza investimentu ba tempu naruk.
“Buat ne’ebé ami husu iha hasoru malu ho Sekretáriu Estadu ne’e mak oinsá bele apoia ami iha plataforma dijitál ne’ebé ami halo ne’e foin la’o maibé presiza investimentu ruma tenke ho durasaun ba tempu naruk atu nune’e ita publika kontíudu ruma bele kleur, maibé ami-nia kbiit halo plataforma ne’e foin ho durasaun ba tinan-ida,” nia tenik.
Sira mós konvida Sekretáriu Estadu atu vizita direita Kontener Tais hodi haree kondisaun sira. Fatin ne’e foin lalais inaugura ho apoiu husi Uniaun Europeia ne’ebé jere husi Institutu Camões no apoiu mós husi Governu liuhusi Ministériu Turizmu.
Iha biban hanesan, Sekretáriu Estadu Expedito apresia ho inisiativa joven kreativu sira.
“Hasoru malu ho joven kreativu sira husi Kontener Tais, sira mai halo diskusaun ho ha’u kona-ba sira-nia atividade ne’ebé sira hala’o, sira-nia atividade importante tebes tanba dezenvolve ita-nia kultura liuhusi tais, sira-nia kriatividade atu loke luan liu ba iha kriasaun plataforma dijitál ida-ne’ebé bele akomoda serbisu sira ne’ebé relasaun ho kultura no tais,” Expedito hato’o.
Governante ne’e dehan, durante enkontru, grupu ne’e hato’o inisiativa dezenvolve tan kultura iha kontíudu kreatór no estabelese plataforma dijitál hodi akumula baze dadus ba artista timoroan sira ne’ebé seidauk hamutuk iha baze ida.
“Sira ne’e hanesan asosiasaun ida, ba oin ita sei haree atu nune’e SEKOMS bele serbisu hamutuk ho sira. Ha’u hateten ba sira katak Governu sempre fó atensaun ba iha joven sira nia talentu no kreatividade, hein katak ho avansu teknolojia ne’ebé maka’as hanesan AI, joven sira tenke hatudu nafatin talentu atu partisipa másimu iha mundu kriativu liuliu promove ita-nia kultura,” nia hato’o.
Sekretáriu Estadu konsidera atividade di’ak ida mak hakarak dezenvolve tais husi munisípiu idaidak, nune’e ba oin sei haree no apoia iha plataforma dijitál iha área informasaun ba mídia.
“Indústria kultura sira hetan apoiu ona husi Sekretáriu Estadu Arte no Kultura no Gabinete Apoiu Sosiedade Sivíl, iha parte dijitál nian mak ohin sira mai hasoru ha’u ami ko’alia,” nia konklui.
Jornalista : Hortêncio Sanchez
Editora : Julia Chatarina
