KFP sei halo verifikasaun ba funsionáriu públiku determina númeru loos
DILI, 13 Outubru 2026 (TATOLI) – Prezidente Komisaun Funsaun Públika (KFP), Agostinho Letêncio de Deus informa, KFP sei vizita instituisaun Estadu sira iha tempu-badak atu verifika dadus funsionáriu públiku, ne’ebé to’o agora seidauk iha númeru ezatu.
Agostinho esplika katak, tuir estimativa atuál, númeru funsionáriu públiku, inklui funsionáriu permanente, ajente, kontratadu ho prazu determinadu no traballadór kazuál, hamutuk ema 70.000-resin. Tanba seidauk iha dadus ne’ebé loos no kompletu, KFP sei rekolla informasaun diretamente iha instituisaun Estadu ida-idak.
“Ami forma ona ekipa no iha tempu-badak nia laran sei bá diretamente ba instituisaun Estadu ida-idak atu halo entrevista no rekolla dadus pesoál funsionáriu ida-idak, inklui biodata no knaar ne’ebé hala’o, atu bele identifika no determina númeru loos funsionáriu Estadu nian,” Agustinho dehan ba jornalista sira, hafoin taka formasaun kona-ba karakter iha Letefoho, Munisípiu Ermera, iha loron (10/10).
Notísia relevante:KFP enserra formasaun karakter ba funsionáriu públiku iha Letefoho
Nia aumenta katak, iha tinan lima liubá, númeru funsionáriu públiku hamutuk ema 39.000. Maibé, tuir estimativa atuál, númeru ne’e aumenta ona to’o ema 70.000-resin.
Tanba diferensa entre dadus iha tempu uluk no estimativa atual, KFP konsidera katak presiza halo verifikasaun kle’an atu konfirma númeru loos funsionáriu públiku iha Timor-Leste.
Verifikasaun ne’e sei ajuda KFP atu iha dadus ne’ebé atualizadu no fiável kona-ba funsionáriu públiku sira, inklui sira-nia informasaun pesoál no responsabilidade iha instituisaun Estadu.
Notísia relevante:KFP halo formasaun karáter ba funsionáriu públiku 176
Jornalista: Camilio de Sousa
Editor: Rafael Ximenes de A. Belo
