SEFOPE prioriza programa haat iha tinan 2027
DILI, 22 Outubru 2026 (TATOLI)—Sekretaria Estadu Formasaun Profisionál no Empregu (SEFOPE) iha proposta Orsamentu Jerál Estadu (OJE) 2027 prevee millaun $11.145 hodi finansia programa haat.
Sekretáriu Estadu Formasaun Profisionál Empregu, Rogério Mendonça de Araújo, hateten, prioridade ba tinan oin mak haforsa formasaun hodi prepara joven sira mai ho kualifikasaun hodi hatán ba merkadu traballu iha rai-laran no rai-li’ur.
SEFOPE serbisu hamutuk ho Governu Austrália liuhusi programa Pasific Austrália Labour Mobility Patnership (PALM) atu hasa’e númeru traballadór timoroan 10.000 to’o tinan 2028 ne’ebé serbisu iha rai-lu’ur.
“Ida ne’e, tenke prepara kondisaun ba ita-nia joven sira, liuliu aposta iha sentru formasaun sira ne’ebé akreditadu, nune’e área ne’ebé mak joven sira bá, tuir duni abilidade ne’ebé mak iha,” Governante ne’e hatete hafoin ramata audiénsia públika kona-ba proposta OJE 2027 ho Komisaun D ne’ebé trata asuntu Ekonomia no Dezenvolvimentu iha Parlamentu Nasionál, Kinta ne’e.
Notísia relevante : SEFOPE mobiliza traballhadór timoroan 95 servisu iha Nova Zelandia
Tuir dokumentu livru orsamentál ne’ebé Ajénsia TATOLI asesu, iha proposta OJE 2027 SEFOPE prevee $11.204.377 hodi aloka ba saláriu no vensimentu $3.510.000, bens no servisu $4.586.060, transferiénsia públika $2.145.160, kapitál dezenvolvimentu $963.157. Hodi finansia programa haat mak hanesan programa dezenvolvimentu rurál no urbanu ho nia sub-programa ida atu reforsa serbisu SEFOPE iha munisípiu no exteriór.
Programa funsionamentu no dezenvolvimentu instituisionál ho nia sub-programa tolu. Programa inkluzaun sosiál ho sub-programa ida. Programa investimentu no diversifikasaun ekonómika ho nia sub-programa neen, relasaun traballu, estratéjia nasionál empregu, informasaun nasionál kona-ba mão de obra no merkadu traballu, kria oportunidade empregu, sertifikasaun instituisaun no sentru formasaun, infraestrutura no instalasaun ba formasaun profisionál empregu inklui edifísiu públiku.
Rogeiro dehan, proposta orsamentu ba tinan oin hetan aumenta millaun $2-resin kompara ho tinan fiskál ne’e, ne’ebé aloka iha verba transferiénsia públika hodi bele reforsa programa empregu temporáriu no haforsa formasaun ba iha sentru formasaun sira.
“Reforsu sentru formasaun hodi prepara kondisaun formasaun ba joven sira, liuliu identifika merkadu traballu ne’ebé mak iha korresponde nesesidade,” nia katak.
Iha audiénsia ne’e, SEFOPE atualiza ezekusaun OJE 2026 ne’ebé atinje ona 74% husi orijen millaun $9-resin.
Jornalista : Nelson de Sousa
Editora : Julia Chatarina
