APC halo sensibilizasaun ba suku 200-resin kona-ba prevensaun-mitigasaun bailoro naruk
DILI, 23 Outubru 2026 (TATOLI)—Autoridade Protesaun Sivíl liuhusi Dirasaun Gabinete Relasaun Esternu no Komunikasaun halo ona sensibilizasaun ba suku 200-resin iha Timor-Leste kona-ba prevensaun no metigasaun bailoro naruk hahú husi tinan 2025 to’o 2026.
Diretór Dirasaun Relasaun Esternu no Komunikasaun, Cesario da Silva Marques, hateten APC sempre halo alertamentu ba komunidade sira atu evita suru rai arbiru iha situasaun ida bailoro naruk (el nino).
“Ida-ne’e hanesan asaun prevensaun ne’ebé ami halo liuhusi Dirasaun Gabinete Relasaun Esternu no Komunikasaun ne’ebé fahe informasaun kona-ba prevensaun no metigasaun to’o iha nivel suku,” Diretór ne’e relata ba Agência Tatoli iha nia kna’ar fatin, Kaikoli, ohin.
Tuir nia, maneira ida-ne’e atu oinsá fó atensaun ba komunidade sira evita sunu rai arbiru, nune’e bainbira to’o tempu bailoro naruk labele fó impktu ba bee matan sira-ne’e ita konserva ona.
“Ne’ebé agora daudaun iha tinan 2025 to’o 2026 ne’e, ami konsege sosializa informasaun ba suku hamutuk 200-resin.” nia informa.
Nia hatutan, kona-ba sira-nia preparasaun ba planeamentu emerjénsia nasionál tanba ekipa bombeiru daudaun ne’e destaka hotu iha munisípiu no konstrui tanke rezervatóriu ba bee nian ho volume litru 5000.
“Maibé ita nafatin iha problema ho distánsia tanba suku balun hela distánsia dook husi bombeiru nia fatin. Aleinde fasilidade hanesan viatura Autotanke médiu destaka ida de’it iha munisípiu, balun kondisaun ladun di’ak ona, ne’ebé atendimentu emerjénsia dalaruma tarde. Maibé kona-ba hahán (food item) estoke kompletu hela hodi responde ba komunidade afetadu sira,” nia dehan.
Enkuantu. nia hatutan, kona-ba fasilidade viatura bombeiru ne’ebé daudaun ne’e iha provizoriamente hamutuk 65-resin.
Jornalista : Alexandra da Costa
Editór : Cancio Ximenes
