BTL arrekada reseita millaun $2,1 iha trimestre datoluk
DILI, 26 Outubru 2026 (TATOLI) – Bee Timor-Leste, Empreza Públika (BTL, E.P), rekolla, entre Janeiru no Setembru 2026, reseita hamutuk millaun $2,1 ba kofre Estadu.
Prezidente BTL, E.P, Gustavo da Cruz, informa katak projesaun Ministériu Finansa ba BTL iha tinan ne’e rekolla reseita millaun $3, nune’e BTL kontinua halo esforsu atu atinje alvu ne’e iha.
“Ami esforsu atu hasa’e reseita to’o millaun $3, nune’e bele taka ami-nia dívida sira”, Gustavo da Cruz hatete, ohin.
Reseita ne’ebé BTL rekolla maihusi selu koima, ligasaun foun, fa’an bee-moos, teste bee iha laboratóriu no seluk tan.
Kona-ba ezekuasaun Orsamentu Jerál 2026, BTL rasik tinan ne’e hetan alokasaun hamutuk millaun $4,5, ne’ebé ezekuta ona 75% ka ekivale $3.375.000.
Dirijente ne’e adianta katak OJE 2027 ba BTL hetan tetu hamutuk millaun $8, ne’ebé prioriza ba halo melloramentu sistema bee-moos ba komunidade. “Tinan oin mós ita nafatin hetan projesaun ba reseita hamutuk millaun $3”, nia informa.
Notísia relevante: BTL planeia transforma sistema bee-moos rurál ba urbanu iha Bobonaru no Atabae
Jornalista: Arminda Fonseca
Editora: Maria Auxiliadora
