Ministru Interiór orienta PNTL solusiona konfrontu Beto
DILI, 28 Outubru 2026 (TATOLI)–Ministru Interiór, Francisco da Costa Guterres, orienta ona Polísia Nasionál Timor-Leste (PNTL) atu solusiona konfrontu iha área Beto, Suku Madohi, Postu Administrativu Dom Aleixo, Munisípiu Dili, iha Segunda (26/10) maizumenus tuku 19:00.
Grupu joven balun provoka malu bainhira família balun lori mate-isin liu, nune’e mosu konfrontu tuda malu iha área referida no rezulta uma no keoske hetan estragu, ne’ebé husi konfrontu ne’e Polísia detein ema na’in-haat ne’ebé suspeitadu ba konfrontu ne’e.
“Horseik iha ne’ebá ne’e kestaun ida, daudaun Polísia Komunitária la’o hela para halo diálogu, monta hela postu iha ne’ebá, ne’e kestaun ne’ebé ita bolu dehan nakarten sira ne’e. Nakarten la kontrola-an, tuur hemu tua, depois sai problema. Ema lori nia saida ba mak depois halo problema, ne’e kerdizer atitude ne’ebé ita presiza muda, ema bolu dehan katak nakar joven sira-nian,” Ministru Francisco hateten ba Jornalista sira hafoin partisipa iha reuniaun Konsellu Ministru, Kuarta ne’e.
Notísia relevante : Autoridade Seguransa detein suspeitu na’in-haat iha konfrontu Beto
Nia konsidera, konfrontu ne’e la influénsia buat ruma inklui ba estabilidade iha rai-laran.
Governante ne’e dehan, Polísia kontinua la’o no halo aprosimasaun ho líder komunitária, tama eskola no bairru sira.
“Bairru sira ko’alia ho komunidade sira liliu joven sira tenke muda sira-nia mentalidade para partisipa iha dezenvolvimentu ida-ne’e, importante liu baku malu ne’e la lori benefísiu ida. Ha’u fó orientasaun ona ba Komandu atu foti medidas fortie, ne’e ha’u dehan kedan sira sei foti medidas forte no sei kontinua halo patrullamentu konjunta ho F-FDTL no iha Polisiamentu Komunitária sira tuun nafatin halo liña koodenasaun ho Xefe Suku, Xefe Aldeia sira para kontinua tuun ba kraik Konsellu Suku tun ba kraik sira organiza dialogu, diskusaun ho komunidade sira hodi buka solusaun oinsá para atu labele mosu konflitu sira hanesan ne’e,” nia tenik.
Jornalista : Natalino Costa
Editora : Julia Chatarina
