Xanana husu Membru Governu sira tenke partisipa másimu iha debate OJE 2027
DILI, 04 Novembru 2026 (TATOLI)—Primeiru-Ministru, Kay Rala Xanana Gusmão, husu ba Membru Governu sira tenke prepara-an no prepara dadus hodi partisipa másimu iha debate Orsamentu Jerál Estadu (OJE) tinan 2027.
Sekretáriu Estadu Komunikasaun Sosiál, Expedito Dias Ximenes, hateten iha kada kuarta feira realiza reuniaun Konsellu Ministru ordináriu no ohin nian laiha ajenda atu diskute proposta ruma husi membru Guvernu sira.
“Primeiru-Ministru fó de’it orientasaun ba membru Governu sira atu prepara-an hodi partisipa másimu no di’ak iha debate Orsamentu Jerál Estadu 2027 ne’ebé sei hahú iha 09 Novembru,” Sekretáriu Estadu Komunikasaun Sosiál, Expedito Dias Ximenes, hateten ba jornalista sira iha Palásiu Governu, ohin.
Nia dehan, Xefe Governu husi liña ministeriál sira prepara dadus no ezekusaun sira-ne’ebé la’o tiha ona inklui planu programa ba tinan 2027 nian.
“Hein katak hotu-hotu sei hato’o pedidu ne’ebé orgaun lejizlativu sira husu iha debate jeneralidade nian no sei prepara fali ba iha debate espesialidade ne’ebé akontese iha 24 Novembru to’o ramata,” nia hateten.
Nia informa, debate OJE 2027 nian pauza tanba Primeiru-Ministru sei ba partisipa iha simeira ASEAN ne’ebé sei hala’o iha Filipina nomós Prezidente Parlamentu Nasionál ho membru Deputada balun sei partisipa iha reuniaun IPA iha Filipina.
Jornalista : Alexandra da Costa
Editór : Cancio Ximenes
