DILI, 11 agostu 2021 (TATOLI)—Ministru Obra Públika (MOP), Salvador Eugênio dos Reis Soares Pires, aprezenta Projetu Dekretu-Lei iha reuniaun Konsellu Ministru (KM) no hetan ona aprovasaun.
Lejizlasaun ne’e kona-ba alterasaun dahuluk ba Dekretu-Lei númeru 27/2010, loron 22 dezembru, ne’ebé aprova ona Rejime Jurídiku Sertifikasaun no Inskrisaun Empreza Konstrusaun Sivíl no Konsultória Téknika Sivíl.
“Ho intervensaun lejizlativa ne’e hakarak elimina limitasaun ne’ebé uluk la permite empreza nasionál sira hala’o serbisu konstrusaun sivíl nian ho valór a’as millaun $7,5”, Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu, iha Palásiu Governu.
Notísia relevante: Prosesu pra-kualifikasaun, MOP-DNA sei reativa sistema hodi renova sertifikadu invalidu
Antes ne’e, projetu sira ne’ebé mak ho montante boot hanesan liu millaun $7,5 só empreza internasionál mak toma konta, enkuantu empreza nasionál karik hakarak envolve tenke halo konsórsiu ka parseria ho empreza internasionál.
“Maibé ho desizaun ne’e, empreza timor-oan sira karik bainhira iha kapasidade rasik depende ba kondisaun ne’ebé maka dekretu-lei ne’e hatuur, sira bele kompete, ne’e signifika Governu hakotu ona diskriminasaun entre empreza nasionál no internasionál no haree de’it ba kapasidade idaidak nia atubele halo servisu ho kualidade,” Fidelis esplika.
Jornalista : Antónia Gusmão
Editora : Julia Chatarina
