DILI, 11 outubru 2022 (TATOLI)—Prezidénsia Konsellu Ministru (PCM, siglá portugés) iha proposta Orsamentu Jerál Estadu (OJE) 2023 prevee $4,758,338 hodi kontinua fó prioridade ba programa reforma Estadu ho boa-governasaun no jestaun institusionál.
Notísia Relevante: PM prevee millaun $4-resin iha proposta OJE 2023
“Tinan 2023 proposta hosi PCM prevee millaun $4,758, ho nia programa rua mak reforma Estadu ho boa-governasaun no jestaun instituisional, ho sub-programa ualu (8) no atividade 33,” Ministru Prezidénsia Konsellu Ministru (PCM), Fidelis Manuel Leite Mangalhães. Hateten ba jornalista sira hafoin halo audiénsia proposta OJE 2023 ho komisaun A trata asuntu Justisa no Konstituisional iha Parlamentu Nasionál, tersa ne’e.
Proposta orsamentu tinan oin ne’e aumenta rihun $40 kompara ho tinan ne’e ho nia programa nafatin kontinusaun de’it.
Programa sira kontinua nafatin área atuasaun kna’ar PCM nian mak apoiu ba iha Primeiru Ministru hodi fó apoiu ba serbisu Governu nian tomak hanesan komunikasaun estratéjika liuhosi gabinete porta-vós Governu, koordenasaun no apoiu legál, prestasaun serbisu tradusaun liu-liu norma sira, tau matan ba inisiativa reforma Estadu nian inklui jere PCM.
Iha 2023 ne’e sei hala’o eleisaun lejislativa hanesan tinan polítika, nia hatán, sei laiha problema ba ezekusaun programa no orsamentu tanba PCM ninia orsamentu fiksa hotu ona ba atividade rekorrente hanesan gastu membru Governu nian, Konsellu Ministru (KM), reuniaun KM kontinua la’o, paresér legál no ezbosu ho aktu normativu prodús nafatin.
Iha parte seluk, Governante ne’e la esplika detallu kona-ba rezultadu serbisu ba tinan ne’e no progresu ezekusaun OJE 2022 maibé kestaun sira-ne’e hato’o ona durante iha audénsia no nia garante ezekusaun OJE 2022 ba PCM to’o tinan ne’e ramata bele atinje to’o 90%-resin.
“Ami hato’o hotu ona iha relatóriu no komisaun kontente ho dezempeñu kna’ar ne’ebé PCM halo ne’ebé ritmu ezekusaun to’o iha tinan nia rohan ne’e bele to’o 90%-resin,” nia dehan.
Tuir livru anexu XI planu anuál ba serbisu no entidade setór públiku administrativu, ba 2023 PCM iha programa reforma Estadu prevee $69,188 ho sub-programa reforma administrativa nia atividade planu desburokratizasaun administrasaun públika, elaborasaun proposta prosedimentu komunikasaun instituisionál, apoiu serbisu órgaun administrasaun ho efisiénsia ho prosedimentu, elabora proposta revizaun polítika nasionál fortalesimentu instituisional.
Programa boa-governasaun no jestaun instituisionál prevee $ 4,144,622 ho sub-programa boa-governasaun no atividade planeamentu dezenvolvimentu estratéjiku no orientasaun polítika, inspesaun fiskalizasaun no auditoria, sub-programa jestaun instituisionál ho atividade hitu (7), sub-programa parseria ho atividade ida (1).
Sub-programa apoiu Primeiru-Ministru iha koordenasaun Governu no prezidénsia KM ho atividade apoiu Primeiru-Ministru iha koordenasaun Governu, reprezentasaun KM no PM, koordenasaun prezidénsia KM, subsídiu ba membru Governu.
Sub-programa koordenasaun legál KM ho atividade neen (6), sub-programa komunikasaun estratéjika Governu no promosaun sidadania ho atividade lima (5), sub-programa prestasaun serbisu tradusaun ho atividade haat (4).
Tuir portál transparánsia hosi Ministéiru Finansa iha loron tersa (11 outubru 2022) ne’e, fó sai katak OJE 2022 ba PCM ho orijen $4,717,347.00, kompromisu sira $509,580.75, obrigasaun sira $393,110.24, atuál $3,040,055.23, saldu $774,600.78 no nia ezekusaun atinje ona 72.8%.
Relevante: Ohin, PN hahú halo audiénsia públika ba proposta-lei OJE 2023
Jornalista : Nelson de Sousa
Editór : Cancio Ximenes
