MALIANA, 04 maiu 2023 (TATOLI)-Reprezentante Programa Nasaun Unida ba Dezenvolvimentu (PNUD) iha Timor-Leste, Tuya Altanjerel, kinta ne’e entrega insineradór lixu iha Hospital Referál Maliana ba Ministra Saúde, Odete Maria Freitas Belo.
Tuya Altanjerel, agradese ba Governu Timor-Leste ne’ebé mak fó ona konfiansa ba PNUD no kompromete sei kontinua atu serbisu hamutuk hodi halo di’ak liután sistema kuidadu saúde no hasa’e moris di’ak ba povu.
“Ami kontente tebes entrega insineradór lixu nian ba dahuluk iha Hospital Referál Maliana, PNUD hodi governu Timor sosa mákina ne’e haruka ho Ró, mákina Insineradór Addfield MP atus rua ne’ebé avansadu no modernu sosa no importa hosi Inglaterra,” nia hateten.
PNUD sosa mákina ne’e tanba garante iha kualidade di’ak no prienxe ona padraun jualidade internasionál, tanba ne’e atu asegura funsionamentu mákina ne’e PNUD fasilita ona formasaun ba pesoál tékniku Hospital Referál Mlaiana na’in-ualu kona-bá oinsá halo instalasaun no operadora.
Nia espera mákina ne’e uza bele fó rezultadu pozitivu no transformasaun ho tempu naruk iha área jestaun lixu ospitál tanba bele kontribui signifikamente atu hadi’ak saúde públika, liuliu bein-estár ba ema no ambiente.
“Tratamentu ne’ebé la adekuadu no la apropriadu ba llixu saúde nian, bele fó konsekuénsia saúde públika ne’ebé sériu no bele fó impaktu signifikante ba ambiente, sunu lixu iha ospitál iha área livre bele hamosu poluisaun ár, no wainhira lixu ne’e la sunu ho di’ak bele fó mos risku ba kontaminasaun,” Tuya katak.
Ministra Saúde, Odete Maria Freita Belo, reforsa instalasaun mákina ne’e atu halo jestaun ba lixu Biolójiku sira-ne’ebé Hospital Referál Maliana prodús kada loron.
“Ho mákina ida-ne’e bele presta servisu di’ak liután ba ita-nia kontrolu kualidade, ha’u hanoin ita bele minimiza ka redús ita-nia insfesaun noskomiál ne’ebé maka ita sempre rona infesaun sira-ne’ebé akontese iha ospitál bainhira pasiente ida moras iha-ne’e,” nia dehan.
Instalasaun Inseneradór foun ne’e dezeña espesífika liubá ospitál, klínika no sentru vasinasaun sira iha mundu tomak, mákina ne’e bele prosesa lixu médiku ho kategoria oinoin.
Enkuantu mákina ne’e mós bele harahun lixu ho kilograma 150 to’o 300 iha tempu hanesan ho durasaun oras neen (6). Insineradór ne’e mós bele harahun lixu sira ho efetivu liuliu lixu opsitál hanesan plástiku, besi, no sasán Biolójika, mákina ne’e mós bele sunu lixu médiku ho temperatura aas husik hela ahi-kdesan no la halo su’ar.
Notísia Relevante: MS inaugura infraestrutura saúde neen iha Bobonaro
Jornalista: Sergio da Cruz
Editór: Evaristo Soares Martins
