MALIANA, 24 jullu 2023 (TATOLI)-Sala aula tolu iha eskola Ensinu Báziku Filiál (EBF) iha aldeia Samutabe, suku Manapa, postu administrativu Cailaco, munisípiu Bobonaro, daudaun ne’e kondisaun la dignu ba estudante na’in sira atu tuir prosesu aprendizajen.
Diretór EBC Samutaben, Filomeno de Soro-Kama, konfirma eskola ne’e iha neen maibé sala tolu de’it mak kondisaun di’ak no restante aat hotu kedas nune’e obrigatóriu kada aula bele akumula estudante na’in-50.
Nia konfirma eskola ne’e konstrui iha tinan barak nia laran nune’e to’o ohin loron kalen sira ferrujen hotu, plafon sira mós naksobu hotu ona.
Notisia relevante: Edukasaun Bobonaro presiza tán karteira eskolár 165 ba eskola foun
“Aula ba estudante sira la sufisiente, tanba sala tolu sorin ne’e kondisaun la di’ak ona, ida-ne’e prezudika ba prosesu aprendizajen ba alunu no profesór sira, ba aluns preduzika tanba ladún toma atensaun másimu hosi manorin sira, nune’e mos manorin hetan prezudikasaun tanba labele atende alunu barak to’o oras hotu,” nia informa ba jornalista sira, sábadu semana kotuk.
Problema seluk ne’ebé EBC ne’e enfrenta mak fatin eskritóriu mos ladún sufisiente, nune’e labele akumula hotu profesór sira iha fatin ida.
Alende ne’e eskola ne’e mós hasoru problema laiha moru protesaun inklui mobilizáriu eskola sira hanesan kadeira no meza.
“Ami profesór sira fatin la to’o sena malu iha fatin kloo, sé mak mai uluk nia mak tur, sé mak ikus pasiénsia nia tenke hamriik, kadeira no meza ba estudante la kompletu,” nia katak.
Estudante Terezinha Maia, husu ba Ministériu Edukasaun atu rezolve lalais problema ne’e nune’e sira bele tuir prosesu aprendizajen ho di’ak no seguru.
“Ami hasoru situasaun ne’e tanba kondisaun eskola ladiak, ami-nia kadeira meza sira aat hotu, ami husu governu tau-matan,” nia informa.
Enkuantu iha EBC ne’e totál estudante na’in-428 no totál profesór na’in-19, komposta hosi permanente 10 no kontratadu na’in-sia.
Notísia relevante: ME sei konstrui-reabilita eskola 15 iha Bobonaro inklui EBC Tapo
Jornalista: Sérgio da Cruz
Editór: Evaristo Soares Martins
