VIQUEQUE, 27 jullu 2023 (TATOLI)—Diresaun Servisu Rejistu Notariadu (DSRN) munisípiu Viqueque daudaun ne’e laiha blanku rejistu kriminál durante fulan-tolu ona.
“To’o agora mós blanku seidauk iha, nune’e kada loron bainhira abitante Viqueque mai halo rejistu kriminál, ami print de’it surat-tahan mutin maka fó ba sira tanba blanku seidauk mai munisípiu Viqueque,” Diretór Servisu Rejistu Notariadu munisípiu Viqueque, Aniceto Moreira, informa iha ninia knaar fatin, Beloi, kinta ne’e.
Parte DSRN Viqueque hato’o ona pedidu ba Ministériu Justisa, maibé to’o agora seidauk distribui.
“Bainhira ita print iha surat-tahan mutin maka foin halo verifikasaun hotu hafoin ha’u asina no tau karimbu maka entrega ba abitante sira. Ohin dadeer mós iha juoen na’in-30 maka halo rejistu kriminál, ne’ebé ami fó surat-tahan de’it. Maski ho surat-tahan mutin maibé válidu, nune’e joven sira uza serbisu ka bá rai-li’ur,” nia akresenta.
Notísia relevante : Rejistu Sivil Viqueque prodús sertidaun moris provizóriu tanba laiha blanku
Daudaun ne’e parte diresaun sei iha blanku sertidaun moris 1.000, Bilhete de Identidade (BI) 500, enkuantu blanku ba sertidaun kazamentu no óbitu sufisiente.
“Ami fó atendimentu hahú segunda to’o sesta. Iha Viqueque abitante sira trata dokumentu barak liu maka sertidaun moris, BI no rejistu kriminál, sertidaun kazamentu no óbitu ema ladún halo,” Diretór relata.
DSRN Viqueque konsege prodús BI 1.217 hahú janeiru to’o jullu no sertidaun moris ne’ebé rejista ona iha livru asentu hamutuk 47.
Daudaun ne’e, funsionáriu DRSN Viqueque permanente iha na’in-haat no kontratadu na’in-lima maka halo atendimentu ba abitante sira.
Jornalista : Vitorino Lopes da Costa
Editora : Julia Chatarina
