OÉ-CUSSE, 14 agostu 2023 (TATOLI – Konsellu Imprensa Timor-Leste (CITL, sigla portugés), servisu hamutuk ho Austráñalian Broadcasting Corporation (ABC) Departamentu Dezenvolvimentu Internationál (ABCID, sigla inglés) fasilita formasaun ‘Journalism Fundamentals Training’ hodi hasa’e jornalista sira-nia abilidade ba kontestu kobertura ba publikasaun notísia.
Formasaun ne’e realiza durante loron tolu, hahú iha loron segunda 14 to’o 16 agostu 2023, hala’o iha salaun Dominikana Oé-Cusse, ho partisipante hamutuk na’in-24 ne’ebé reprezenta mídia sira mai hosi rádiu komunidade sira iha munisipíu, mídia online, mídia imprime no televizaun sira iha territóriu Timor-Leste.
Notísia relevante: Presiza rekursu di’ak jere institutu formasaun jornalista
Diretór Diresaun Analiza no Dezenvolvimentu Mídia hosi CI, Alberico da Costa Junior, informa, formasaun ne’e parte ida hosi rezultadu kooperasaun entre Konsellu Imprensa ho ABCID, ne’ebé daudaun ne’e hala’o hela servisu misaun nian iha Timor-Leste durante tinan haat.
“Formasaun ne’e ba loron tolu, alvu loloos mak ba jornalista sira, balu iha RAEOA balu iha Díli no mós jornalista volúntáriu sira iha rádiu komunidade mai hosi munisipíu sira,” Alberico da Costa, ba jornalista sira hafoin abertura formasaun ne’e iha Oé-Cusse, segunda ne’e.
Tuir nia, objetivu hosi Formasaun ne’e atu hametin kompeténsia, liuliu oinsá atu hasa’e abilidade skill jornalista ninian iha kontestu kobertura, atu profisionál liután iha sira-nia servisu atu garante newsroom servisu redasaun ninian, atu fó informasaun ne’ebé faktuál ho kredivél ba audénsia sira liuliu publiku.
“Matenek ne’e relativu ka lae, ita labele dehan jornalista, ita tenke hatene buat hotu-hotu, maibé importante liu, maka ita tenke atualiza beibeik matenek ne’ebé iha, tanba mundu agora ne’e dijitalizadu, entaun jornalizmu ne’e mak nia evaluasaun ne’e dinámiku, entaun formasaun labele para, ita kontinua nafatin” nia afirma.
Tan ne’e maka CI parte ida hala’o ninia misaun oinsa atu hametin kapasidade jornalista liu-liu iha kontestu kobertura ninian ho públikasaun notísia liu-liu oinsa atu garante informasaun loloos no kredivél ba públiku.
Formadór hosi ABCID, Michael Coggan, espera durante formasaun bele kompleta malu kona-bá matéria no prátika jornalizmu nian.
“Buat ida importante durante iha formasaun ne’e, maka bainbain jornalista sira iha terrenu husu pergunta ba fonte sira, entaun iha oportunidade ne’e sai espasu ba sira atu husu pergunta ba malu, oinsá hakerek notísia di’ak, balansu no kredivel ba iha publiku ” nia katak.
Formadór Caroline Warter, reforsa-tán, formasaun ba jornalista sira, importante tebes atu fahe esperiénsia no mós aprende di’akliu-tán atu oinsa sai jornalista profisionál.
“Materia drante formasaun ne’e, maka oinsa hakerek notísia notísia di’ak, hakerek istória ida ho balansu, ida-ne’e importante atu aprende ba malu, buat ida sai jornalista ne’e, sai previleizu bo’ot no ondra bo’ot, entaun nu’udar jornalista tenki orgullu sai jornalista,” nia fó hanoin.
Notísia relevante: CI atribui karteira profisionál ba jornalista na’in-hitu iha RAEOA
Jornalista: Abílio Elo Nini
Editór:Evaristo Soares Martins
