OÉ-CUSSE, 22 fevereiru 2024 (TATOLI) – Prezidente Autoridade RAEOA, Rogério Tiago Lobato, akompaña Koordenadór Ezekutivu ZEESM, João Mendes Gonçalves, kinta ne’e lansa rega adubu organiku ho naran Ako’y Magsasakang Organiku (AMO), ba natar ektare rua iha natar Holosa, suku Lalisuk, sub-rejiaun Pante Makasar.
Adubu organiku Ako’y Magsasakang Organiku (AMO), mai hosi nasaun Filipa, daudaun ne’e utiliza ona iha munisípiu sira iha territóriu nasionál, ho nia funsionamentu, uza ba natar atu hasa’e produsaun, tanba bele hamate peste Lakataru no bele uza mós ba produtu seluk.
Notísia relevante:Natar ektare 23 iha Holosá Oé-Cusse ameasa falla kolleta
Prezidente Autoridade RAEOA, Rogério Tiago Lobato, konsidera adubu Ako’y Magsasakang Organiku ne’e, bele hasa’e produtividade, la’ós de’it ba hare maibé produtu seluk, hanesan batar, ai-fuan no modo no bele hamate mós peste Lakataru.
“Ita sei halo buat barak ida rai ne’e, tanba ita hodi adubu ida, bele hasa’e produtividade hosi tonelada 2 bele sa’e ba tonelada 8 kada ektare, ne’e di’ak tebes ba agrikultór sira, no di’ak tebes ba Oé-Cusse,” Rogério Tiago Lobato, ko’alia iha serimónia lansamentu hala’o iha natar Holosa.
Eis Ministru Interiór ne’e, informa, lansamentu ne’e fazeadamente, aplika uluk ba ektare rua, faze tuir mai bele ba fatin seluk, atu halo komparasaun ba rezultadu kolleta époka nian.
“Kuandu rezultadu di’ak ona, ita sei hatama kuantidade boot, nune’e bele hasa’e produtividade hare nian, tanba ita hakarak hasa’e produsaun hare Membramo iha Oé-Cusse, iha futuru bele fa’an ona ba nasionál no munisipíu seluk,” nia promete.
Reprezentante adubu orgániku AMO, Pedro Reis esplika, daudaun ne’e implementa ona iha territóriu nasionál, tanba funsaun hosi AMO ne’e rasik sai hanesan adubu no sai mós hanesan ai-moruk hamate peste hotu-hotu.
“Kuandu ita rega ona iha hare, gafanutu no laho mós sei mate, dalaruma bee laiha, hare sei matak nafatin,” nia afirma.
Notísia relevante:Agrikultór Cunha no Lalisuk iha Oé-Cusse hahú halai natar époka 2023
Eis Ministru Agrikultura no Peska ne’e, hateten, bainhira uza ona adubu AMO, sei ajuda agrikultór sira, hamenus gastu osan sosa ai-moruk, tanba adubu AMO bele rezolve ona buat hotu, la’ós ba hare de’it maibé bele uza mós ba produtu seluk hanesan, batar, ai-farina, modo no seluktán.
“Tan ne’e ohin ita koko uluk ba ektare rua, sei nia rezultadu di’ak ita sei propoin, Autoridade RAEOA tau iha planu orsamentu, prepara ba futuru, maibé atu atinje rezultadu tuir nia padraun, kada loron 15 presizaa rega beibeik, no natar na’in presiza hamoos duut,” nia apela.
Iha biban ne’e, xefe suku Lalisuk, Hermenegildo Lalisuk, reprezenta natar na’in-sira agradese no apresia tanba ho polítik ne’e bele rezolve ona komunidade sira-nia preokupasaun.
“Preokupasaun natar na’in-sira iha ha’u-nia, tinan barak ona, tanba peste maka ataka, to’o rezultadu kolleta menus, maibé ami fiar ho adubu foun ne’e bele rezolve ona agrikultór sira liuliu natar,” nia katak.
Domingos Sufa, nu’udar agrikultór hosi natar Holosa, espera, ho adubu orgániku foun ne’e bele tulun ona agrikultór sira, liuliu hamate peste Lakataru.
“Ami agradese tebes ba Autoridade RAEOA, tanba adubu ne’e bele ajuda ona ami tanba tinan-tinan ami-nia haree mate, no laiha isin tanba hetan ataka hosi peste Lakataru, ami espera katak, ho prezensa ai-moruk ne’e bele fó ona solusaun ba ami-nia natar sira,” nia orgullu
Notísia relevante:Barajen Tono benefísia natar ektare 1.717 iha Pante Makasar
Entretantu, natar Holosa, lokaliza iha aldeia Manuimpena, suku Lalisuk, sub-rejiaun Pante Makasar, ho medida hamutuk ektare 23.
Jornalista: Abílio Elo Nini
Editór: Evaristo Soares Martins
