DILI, 05 2025 (TATOLI) – Timor-Leste liuhosi reprejentante permanente iha Nasaun Unida Embaixadór Díonisio Babo Soares iha nia ninia deklarasaun durante Reuniaun Formula Konsellu Seguransa Nasoins Unidas Arria konsege toka mós pontu importante kona-ba potensiál transformasaun Intelijénsia Artifisiál (IA) nian hodi dudu progresu umanu no dezenvolvimentu sosiál.
“Aproveita IA seguru, inkluzivu, konfiável ba manutensaun pás no seguransa internasionál, Timor-Leste subliña potensiál transformativu Intelijénsia Artifisiál nian hodi dudu progresu umanu no dezenvolvimentu sosiál. Presiza iha transformasaun dijitál ida ne’ebé inkluzivu, sentradu iha umanu, no metin iha valór demokrátiku sira ne’ebé fahe no direitu umanu,” Dionisio tenik iha nia intervensaun liuhosi nota ne’ebé Agência TATOLI asesu husi pájina ofisial Misaun Permanente Timor-Leste ba Nasaun Unidas, ohin.
Iha okaziaun ne’e, Timor-Leste kontinua toka, importánsia atu garante transparénsia, ekuidade, no responsabilizasaun iha aplikasaun sira AI nian hodi hamenus risku sira no prevene utilizasaun sala.
Husu atu, aplika lei internasionál ba IA fornese fundasaun sólidu ba ninia utilizasaun responsavel iha avansu dame no seguransa.
Organizasaun Nassun Unidas (ONU) bele lidera ho ezemplu hodi uza teknolojia ba benefísiu globál liuhosi aliña aplikasaun sira IA nian ho prinsípiu sira hanesan soberania, la-interferénsia, no direitu umanu.
Atu rezolve impaktu IA nian iha integridade informasaun nian, liuliu liuhosi atake sibernétiku sira, diskursu ódiu nian, no kampaña sira dezinformasaun nian presiza resposta prátika sira, liuliu iha kontestu operasaun dame ONU nian.
Timor-Leste mós rekoñese importánsia hosi inisiativa sira kapasitasaun nian iha rejiaun vulneravel sira, fó kbiit ba komunidade lokál sira atu kontra informasaun sala no haburas estabilidade sosiál.
Hodi avansa inisiativa inkluzivu sira, aliña IA ho lei internasionál, no rezolve ameasa sira ba integridade informasaun nian, IA bele sai aliadu ida ne’ebé maka’as hodi promove dame no seguransa globál.
Jornalista: Hortencio Sanchez
Editór: Florencio Miranda Ximenes
