DILI, 11 Juñu 2025 (TATOLI)–Governu liuhusi Vise Primeiru-Ministru no Ministru Koordenadór Asuntu Sosiál Dezenvolvimentu Rurál no Abitasaun Komunitária, Mariano Assanami Sabino, Tersa ne’e, hala’o enkontru Reprezentante husi Institutu Tony Blair ba kooperasaun serbisu balun.
Institutu Tony Blair halo aprezentasaun polítika ida hodi apoiu Governu liuhusi Gabinete Vise PM Assanami.
“Ida-ne’e mak importante liu hodi mai hasoru Vise Primeiru-Ministru tanba ninia serbisu ligadu ho asuntu sira hanesa sosiál, edukasaun, saúde no juventude. Tanba ida-ne’e mak ami mai ko’alia liuhusi Palásiu Prezidente Repúblika hodi define parte ne’ebé mak ami bele suporta,” Diretór Rejionál Sudeste Aziátiku, Damian Hickey, informa iha sala enkontru Gabinete Vise PM, Palásiu Governu.
Notísia relevante : INSS-BNCTL halo pagamentu ba pensaun sosiál faze daruak iha fulan-ne’e
Diretór ne’e dehan, koordenasaun serbisu ne’e hodi planu tuir mai Governu Timor-Leste no Institutu Tony Blair bele implementa programa sira bazeia ba área ne’ebé define iha serbisu Vise PM.
“Daudaun ami diskute polítika saida mak bele uza hodi apoiu no garante katak apoiu ne’ebé ami fó bele sufisiente, tanba ema ne’ebé atu hetan ajuda ne’e bele iha ospitál, estudante sira-ne’ebé iha eskola laran, inklui juventude sira. Ami hakarak buat ne’ebé ami fó to’o duni ba sira-nia liman, entaun ida-ne’e mak ami diskute hela,” nia katak.
Kooperasaun ida-ne’e sei iha faze diskusaun nia laran maibé parte rua ne’e komprometidu atu serbisu hamutuk hodi realiza implementasaun serbisu sira-ne’ebé propoin ona iha terrenu.
Jornalista : Alexandra da Costa
Editora : Julia Chatarina
