DILI, 04 Jullu 2025 (TATOLI) – Timor-Leste komemora ohin Loron Nasionál ba Ema ho Defisiénsia, nune’e deputadu husi bankada Fretilin sujere ba Governu, liuhusi ministériu kompetente atu fó prioridade ba iha polítika no programa sira hodi garante kondisaun ba Ema ho Defisiénsia (EhD) sira atu bele partisipa iha dezenvolvimentu país nian.
Komemorasaun data iha tinan ne’e, Governu deside tema “Promove direitu Ema ho Defisiénsia liuhusi kompromisu Nonu Governu atu labele husik ema ida iha kotuk”.
Deputadu Fretilin, Antonino Doutel Sarmento, konsidera loron ne’e nu’udar momentu importante atu parte hotu kontinua tau atensaun ba asuntu referidu.
Nia dehan, Timor-Leste hanesan nasaun ne’ebé eziste sosiedade ida oioin, ne’ebé ida mai ho kondisaun normál no seluk mai ho kondisaun fízika defisiénsia.
“Komemorasaun ne’e hodi konfirma katak sira balun moris iha justisa no barak sei moris iha injustisa nia laran. Dejezu parte hotu oinsá fó protesaun ba ema ho defisiénsia sira hodi sira [sente] hanesan ho ema kondisaun baibain iha ita-nia rai, tanba dalabarak ema la haree hetan”, nia hato’o.
Deputadu ne’e salienta katak tuir rezultadu fiskalizasaun, partisipasaun EhD iha nivel edukasaun, asebilidade ba infraestrura bázika no saúde ne’e metade de’it mak hola parte iha dezenvolvimentu. Metade seluk seidauk envolve tanba hela iha izolamentu no laiha kondisaun bázika.
Situasaun ne’e dezafia Governu oinsá halo esforsu hodi kria kondisaun ne’ebé fó oportunidade ba sira atu hola parte iha dezenvolvimentu país nian.
“Tema komemorasaun tinan ne’e labele tau ema ida iha kotuk. Ne’e la’ós tau iha diskursu de’it, maibé tenke iha kbiit ajusta iha planu no programa hodi oinsá hatuur ema sira ne’ebé iha kotuk ne’e hanesan ho tema ne’ebé ita ko’alia”, nia akresenta.
Iha sorin seluk, deputadu husi Partidu Demokrátiku, Manuel Henrique Noronha, lori bankada nia naran felisita EhD hotu iha Timor-Leste. “Ami-nia motivasaun, esperansa, ba ita-boot sira nu’udar sidadaun ida moris iha rai ida-ne’e”, nia hato’o.
Nia kontinua solisita ba Governu no parte hotu atu fó atensaun másima ba ema ho defisiénsia sira.
Notísia relevante: PDHJ nota Governu seidauk fó atensaun másima ba direitu ema ho defisiénsia
Jornalista: Nelson de Sousa
Editora: Maria Auxiliadora
