DILI, 16 Jullu 2025 (TATOLI)—Ministra Saúde, Elia dos Reis Amaral, hateten Ministériu Saúde sei aloka mákina fase raan ba munisipiu sira maibé ida ne’e sei hein desizaun tanba daudaun ne’e mákina sira-ne’ebé mak apoiu husi povu Japaun liuhosi Emprezaria Clarisa sei rai hela iha Hospitál Antonio Carvalho Lahane, tanba sei fó formasaun ba tékniku sira.
Notísia Relevante: Wego Medical entrega mákina fase raan unidade 10 ba Governu
“Kona-ba mákina sira-ne’ebé mak apoiu husi emprezaria Clarisa Lay hamutuk mákina 10 ne’e, Ministériu Saúde sei distribui ba munisípiu sira maibé sei iha prosesu nia laran. Ita agradese ba Empreza no mana Clarissya, entaun ida-ne’e iha faze instalasaun hotu mak ita sei haree, konserteza ita sei distribui ba iha Munisípiu. Ita-boot sira akompaña, mai iha Gabinete Primieiru Ministru mai entrega mákina fase raan 10 mai iha ne’e,” Ministra Élia dos Reis Amaral hateten ba jornalista sira, hafoin partisipa reuniaun Konsellu Ministru, iha Palasiu Governu, kuarta ne’e.
Governante afirma, atu halo instalasaun ba mákina fase raan nia ne’e, presiza kumpre buat barak atu halo tanba mákina fase raan dijitalizasaun, nune’e tékniku sira presiza tuir formasaun kona-ba monta mákina ne’e.
“Atu halo instalasaun agora dadauk lori ona ba iha Hospitál Lahane. Einprinsipiu sei rai hela iha Ospitál Lahane tanba instalasaun ita presiza haree ba buat barak ne’ebé mak kumpre instalasaun. Iha tempu badak, husi empreza ne’e rasik oinsá mak atu fó formasaun tékniku nian ba monta, tanba ne’e diferensa uitoan tanba ne’e dijitalizasaun,” nia hateten.
Antes ne’e, Vise Ministru Saúde asuntu Operasionálizasaun Ospitál, Flávio Brandão, hateten loos duni mákina 10 ne’e simu diretamente husi Ministra Saúde, maibé kona ba desizaun rua tenke halo kordenasaun iha Hospitál Nasionál Guido Valadares atu bele hadi’a Hemodialises iha Timor-Leste.
Nia sujere, mákina ne’ebé mak hetan apoiu husi Empreza ne’e atu koloka mós ba munisípiu sira-ne’ebé hodi minimiza halo transferénsia mai Hospitál Nasionál Guido Valadares
Antes ne’e, Diretora empreza, Clarisa Lay, hatete nu’udár sidadaun no emprezária ida iha dever mós atu tulun bainhira iha difikuldade ruma.
“Hanesan Timor oan, nu’udar sidadaun emprezária, ami mós haree difikuldade saida mak ita presiza apoiu ba ita-nia nasaun no ba sé de’it, la’ós ha’u mais ema barak. Maibé, importante mak bele kolaborasaun di’ak ho ita-nia parseiru sira iha li’ur,” Clarisa Lay hateten ba jornalista sira hafoin hasoru malu ho Primeiru-Ministru Kay Rala Xanana Gusmão, hodi simbólikamente entrega mákina fase raan nian, iha Palásiu Governu, kinta (12 Juñu) ne’e.
Nia dehan, nu’udár emprezária sira sei luta nafatin iha oportunidade hotu ne’ebé bele tulun no apoiu ba nasaun ida-ne’e.
“Nu’udar emprezária, ami luta nafatin iha oportunidade ne’ebé ami sempre haree saida mak ami bele apoiu ba nasaun ida-ne’e. Ida-ne’e mak ami bele halo no apoiu ida-ne’e gratuita, ami la husu buat ruma, ita hanesan fó doasaun,” nia dehan.
Jornalista : Felicidade Ximenes
Editór : Cancio Ximenes
