DILI, 21 Jullu 2025 (TATOLI)-Ekipa voleiból praia mistu husi Timor-Leste marka tan vitória hasoru Mosambike iha Jogu Desportivu Komunidade País Ko’alia Lian Portugés (CPLP).
Jogu iha kategoria mista ne’e, Timor-Leste reprezenta husi Miguelia Pereira Ximenes (1) no Noeh Deo Graçias Viegas (2), enkuantu nia adversáriu Arnoldo Nhantumbo (1) no Alaima Ama Mahumane (2).
Iha inísiu kompetisaun ne’e Timor-Leste hatudu kedas nia forsa ho marka uluk pontu barak maski adversáriu Mosambike mós esforsu, maibé vitória ne’e ba Timor-Leste, ne’ebé iha set dahuluk ho pontu 21-11.
Haree husi rezultadu ne’e, hakat ba set daruak nian, adversáriu Musambike mós lakohi lakon hatudu sira-nia forsa no tátika oioin ikus mai hadau pontu manán filafali ho 21 no Timor-Leste 19.
Iha set ikus, Timor-Leste lakohi fó fatin ba ekipa adversária, nune’e konsege manán ho pontu 15 no Mosambike 6.
Atleta Timor-Leste, Noeh Deo Gracias, hateten iha jogu mistu nian horisehik lakon, maibé ohin manán filafali.
“Rezultadu ohin ne’e tanba ami rua nia serbisu no kolaborasaun iha kampu. Ami manán, ami agradese tebes ba suporta hothotu. Ami sei halo esforsu manán iha jogu ne’e, sei hetan medalla osan-mean ba Timor-Leste”, nia kompromete.
Iha fatin hanesan atleta Miguelia Pereira Ximenes hateten ho rezultadu ohin, nia parte ho parseiru sei halo esforsu iha jogu tuirmai hodi sai vensedór iha voleiból praia.
Nune’e mós adeptu Mariano Martins fiar katak Timor-Leste sei manán iha jogu ne’e. “Ita haree jogadór sira hatudu duni sira-nia forsa no tátika oioin durante jogu”, nia salienta.
Notísia relevante: Volei praia femenina Timor-Leste konkista vitória hasoru Mosambike
Jornalista: Arminda Fonseca
Editora: Maria Auxiliadora
