DILI, 21 Jullu 2025 (TATOLI) – Ekipa femenina Timor-Leste manán Mosambike iha voleiból praia ho set 2-1, iha ámbitu Jogu Desportivu CPLP Edisaun da-12.
Iha set dahuluk, Timor-Leste hatudu sira-nia forsa kontrola jogu, maski Mosambike mós forsa fó rezisténsia. Set ida-ne’e ramata ho pontu 21-19 ba Timor-Leste.
Iha parte daruak nian rua, Mosambike aumenta sira-nia atake no dominasaun, nune’e Timor-Leste hetan difikuldade atu fó rezisténsia. Mosambike manán set ne’e ho pontu 21–12.
Tuir regulamentu, bainhira parte rua manán set idaidak, nune’e tenke tama ba set desizaun nian, ne’ebé sei ramata bainhira ekipa ida hetan pontu 17, katak parte rua ne’e sé to’o uluk pontu 17 nia maka sai manán-na’in.
Iha set ikus ne’e, Mosambike komesa domina no aumenta nia pontu to’o 14, enkuantu Timor-Leste iha de’it pontu 3. Maibé uma-na’in ne’e lakohi husik set ne’e ba Mosambike. Sira esforsu no hetan pontu ne’ebé iha tolu ba to’o 17-15, nune’e Timor-Leste manán ho set 2-1.
Hafoin jogu, atleta Miguelia Pereira Ximenes ho matan-been orgullu nian agradese tanba esforsu hodi bele fó vitória ba Timor-Leste.
“Ha’u sente orgullu tanba konta ami lakon ona, maibé esforsu ikus konsege manán. Ida-ne’e hatudu katak iha esperansa ba ami atu kontinua manán iha jogu tuirmai”, Miguelia espresa ho matan-been kontente nian.
Jogadora seluk, Augusta Belo, mós satisfeita ho apoiu husi husi parte hotu, nune’e ohin konsege manán iha kompetisaun ne’e.
“Horisehik ami lakon, sente triste tebes. Maibé ohin manán fali, ami sente orgullu ba ita Timor-Leste maski jogu seidauk hotu”, dehan.
Treinadór no Koordenadór Voleiból Praia Timor-Leste, Mario Bento Soares, rekoñese katak Timor-Leste derrota iha jogu antes, ne’ebé depende mós husi postu jogadór sira. Maibé nia hateten, hanesan treinadór nafatin buka tátika atu prepara ekipa ba hetan vitória.
“Ha’u fiar katak ba modalidade voleiból praia Timor-Leste sei manán iha jogu ne’e”, dehan.
João Castro, adeptu ne’ebé haree jogu ne’e iha Lesidere mós sente kontente tanba jogu iha modalidade hira ne’e, Timor-Leste lakon no foin ohin iha voleiból praia bele manán.
“Husi jogu ne’ebé ha’u haree, Timor-Leste sei manán. Ita uma-na’in tenke manán iha modalidade balun, tanba Governu gasta osan barak ba eventu ne’e”, nia espera.
Notísia relevante: Timor-Leste sofre derrota hasoru Portugál iha volei praia mistu
Jornalista: Arminda Fonseca
Editora: Maria Auxiliadora
