BOBONARU, 24 Jullu 2025 (TATOLI)—Benefisiáriu sira preokupa ho implementasaun projetu konstrusaun Uma Dignu iha Aldeia Tunubibi, Suku Tapó-Memu, Postu Administrativu Maliana, Munisípiu Bobonaru tanba atraza no laiha progresu dezde fulan-Abríl to’o agora.
Benefisiáriu Manuel Gouveia Leite sente triste ho projetu ne’ebé paradu ne’e, nune’e nia husu ba Ministériu Dezenvolvimentu Rurál no Abitasaun Komunitária fó xamanda ba empreza konstrutora atu hola responsablidade hodi finaliza obra referida.
“Ami-nia uma ne’e sobu iha fulan-Janeiru to’o agora husik hela hanesan ne’e de’it, materiál laiha, servisu tarde, bainhira mak ami atu hela. Agora ami hela iha udan-laran, mahon-been laran. Tanba ne’e, ami husu Governu ezije kompañia konstrui lalais para ami atu hela,” nia informa ba jornalista sira iha fatin konstrusaun, Kuarta ne’e.
Notísia relevante: Assanami triste konstrusaun Uma Dignu iha Tunubibi finaliza tarde
Aleinde ne’e, badaen Luís dos Santos reforsa katak uma ne’ebé nia ho ekipa konstrui fízikamente atinje ona 50% maibé to’o agora paradu hela no seidauk bele kontinua tanba falla iha estoke materiál.
Nia mós preokupa tanba to’o agora kompañia seidauk halo pagamentu ba traballadór.
“To’o agora ami mós seidauk hetan ami-nia direitu tanba projetu halo Uma Dignu ami hetan kontratu bazeia ba ami-nia servisu tuir persentajen ne’ebé determinada,” nia haktuir.
Ba asuntu ne’e, jornalista TATOLI tenta konfirma ho parte kompañia responsavel maibé laiha lokál projetu.
Projetu Konstrusaun Uma Dignu iha Aldeia Tunubibi hamutuk unidade 25 ne’ebé responsabiliza husi Empreza Rics Unipessoal, Lda ho valór orsamentu $798.762.26 no tuir kontratu sei ramata iha 04 Jullu 2025.
Jornalista: Sergio da Cruz
Editór: Xisto Freitas da Piedade
