DILI, 18 Setembru 2025 (TATOLI) – Komisaun B iha Parlamentu Nasionál (PN) ba Asuntu Negósiu Estranjeiru, Defeza no Seguransa, halo audiénsia ho parte Governu sobre ratifika Deklarasaun kona-ba Admisaun Repúblika Demokrátika Timor-Leste ba ASEAN no ratifika adezaun país nian ba Karta ASEAN.
Tanba ratifikasaun sira ne’e permite integrasaun ba adezaun plena Timor-Leste ne’ebé sei formaliza iha 26 Outubru 2025, iha Kuala Lumpur, Malázia.
Vise-Ministra ba Asuntu ASEAN, Milena Rangel, hateten Karta ASEAN ne’e hanesan Konstituisaun ASEAN nian, nune’e hanesan membru tenke adere ba no Deklarasaun kona-ba Admisaun presiza ratifika hodi hato’o país ninia kompromisu katak prontu sai membru plenu.
“Katak, ita prontu adere ba ASEAN ho ita-nia kompromisu sira tuirmai, hodi sai membru plenu no kontinua implementa saida de’it mak iha roteiru laran [hanesan] konvensaun, tratadu, deklarasaun polítika sira ne’ebé ASEAN iha, Timor-Leste sei hola parte ba, entaun tenke iha deklarasaun admisaun ida depois asegura ita-nia adezaun plena”, nia esplika.
Nune’e ho audénsia públika ne’e, Komisaun sei halo ninia relatóriu no pareser antes lori ba plenária hodi hetan aprovasaun.
Aleinde ne’e, Governu sei submete tan tratadu no akordu pur volta 20 ba Parlamentu hodi diskute no aprova, tanba tratadu no akordu nia natureza la hanesan, ne’ené balun aprova de’it iha Konsellu Ministru no seluk tenke lori bá iha PN.
Prezidente Komisaun B, Augosto Domingos ‘Deker’, hateten daudaun komisaun simu ona akordu no tratadu hamutuk 15 no iha semana oin kontinua halo audiénsia.
Tuir nia, dokumentu sira ne’e importante no tenke aprova hotu molok to’o iha 25 Outubru hodi entrega ba Ministériu Negósiu Estranjeiru no Kooperasaun (MNEK) atu submete ba ASEAN.
Relembra katak Parlamentu aprova ona tratadu no akordu 20-resin kona-ba izensaun vistu, serbisu aéreu, komersíu no seluk tan hanesan kritériu ba país nia adezaun ba ASEAN.
Notisiarelevante: Parlamentu presiza aprova tratadu no akordu 60 ba adezaun Timor-Leste ba ASEAN
Jornalista: Nelson de Sousa
Editora: Maria Auxiliadora
