DILI, 15 Outubru 2025 (TATOLI)-Timor-Leste liuhosi Reprezentante Permanente iha Organizasaun Mundiál Komérsiu (OMK), Embaixadór António da Conceição, kuarta ne’e, fornese atualizasaun kona-ba progresu adezaun ba akordu aprovizionamentu governu OMK- WTO ka Government Procurement Agreement (GPA) iha Jenebra Suisa hodi marka Komité nia enkontru formál ba dala 100 dezde adosaun GPA OMK dahuluk iha tinan 1994.
Embaixadór da Conceição, iha ninia deklarasaun relata katak, dezde komunikasaun ikus Timor-Leste nian ba Komité iha loron 10 fulan-Setembru 2025, Governu servisu besik ho parseiru dezenvolvimentu sira, Sentru Komérsiu Internasionál (ITC), no Governu Austrália liuhusi Programa PROSIVU—implementa ona ho susesu atividade konjunta sira ne’ebé envolve ofisiál sira-nia kapasidade téknika husi ministériu no ajénsia xave sira.
Inisiativa sira-ne’e sai hanesan instrumentál hodi hametin komprensaun institusionál kona-ba enkuadramentu GPA nian hamutuk ho ekipa téknika nasionál sira liuhusi ferramenta no metodolojia sira ne’ebé nesesáriu atu prepara Timor-Leste nia oferta hodi asesu ba merkadu.
Daudaun ne’e, Governu Timor-Leste finaliza hela mandatu legál ba estabelesimentu Grupu Traballu Tékniku kona-ba adezaun ba GPA, órgaun interministeriál ne’ebé sei sai hanesan mekanizmu formál ba koordenasaun no konsulta interna iha preparasaun oferta asesu ba merkadu no bainhira mandatu ne’e formaliza ona, Grupu Traballu sei hahú nia operasaun sira.
Kona-ba liña tempu jerál, Timor-Leste iha objetivu hodi kompleta estabelesimentu formál Grupu Traballu Tékniku iha tinan 2025 nia rohan, no kontinua ho submisaun ba nia oferta asesu ba merkadu iha tinan 2026 nia klaran.
Timor-Leste haree ninia adezaun ba GPA hanesan komponente integrál husi ninia estratéjia luan liu ba integrasaun iha sistema komérsiu globál. Governu kontinua espresa ninia apresiasaun klean ba fleksibilidade, orientasaun, no apoiu ne’ebé fornese husi Sekretariadu OMK no parseiru dezenvolvimentu sira durante prosesu ne’e tomak.
Entertantu, enkontru iha loron 15 fulan-Outubru tinan 2025 mós marka marku signifikativu ida enkontru formál ba dala 100 hosi Komité GPA nian dezde adosaun GPA dahuluk OMK nian iha Abril 1994. Desde entrada iha vigór hosi GPA 1994 nian iha Janeiru 1996, Komité konvoka ona enkontru formál 94, adisionál sira hosi enkontru interinu oioin Komité entre 1994 no 1996 iha preparasaun ba implementasaun Akordu nian.
Jornalista : Agapito dos Santos
Editór : Florencio Ximenes
