DILI, 12 Dezembru 2025 (TATOLI)—Diretór Jerál Servisu Koorporativu Ministériu Saúde, Narsicio Fernandes, hateten iha tinan 2026 ne’e Ministériu Saúde sei halo konstrusaun no reabilita postu saúde no sentru saúde iha territóriu.
“Agora ba postu saúde no rezidénsia médiku nian tuir ami-nia tarjetu atu halo 25 postu saúde no mós rezidénsia médiku sira. Maibé balun kontinua la’o hela mak ida mak iha Loes no Maubisse nomós iha Loré ida (1) iha Lautein,” Narsicio Fernandes hateten dehan iha nia kna’ar fatin iha Kaikoli, ohin.
Nia esplika, iha tinan oin projetu lubuk ida-ne’ebé mak sei halo inklui kontinuasaun ba projetu sira-ne’ebé mak iha, tanba sei iha kontinuasaun ba iha Munisípiu Ermera ne’ebé atu harii ospitál acute care no mós halo ospital ida iha Manufahi.
“Agora iha faze Detalle Enginary Desain (DED), husi ne’e mak hatene maizumenus kustu hira mak presiza atu halo konstrusaun ba ospitál iha Munisípiu Ermera no Manufahi. Ita bele prevee osan, maibé ita tenke depende ba dezeñu ne’ebé mak mai, entaun ida-ne’e ami seidauk konklui. Tanba, sira foin tama iha 40% tuir sira-nia relatoriu no banhiira ida-ne’e kompletu ona100%, pois mak ita bele hatene nia montante loloos,” nia relata.
Nia esplika, proposta sira seluk Ministériu saúde tenta no planeia atu haree ba armajen ba ekipamentu médiku nomós haree ba iha ospital munisípiu sira balun tan ne’ebé mak MS hnaoin.
Maibé depende tanba daudaun ne’e iha hela faze diskusaun hela, seidauk atu hateten tanba balun apoiu husi duadór sira no balun seidauk konklui MS seidauk bele fó sai rezultadu tanba sei iha faze preparasaun.
“Ba iha projetu sira-ne’ebé mak ba maternidade, tinan ne’e MS hahú uluk hitu (7) ne’ebé apoiu husi Governu Japaun liuhusi UNFPA. Ida-ne’e servisu hamutuk ho Ministériu Saúde hodi harii maternidade ne’ebé halo reabilitasaun no konstrusaun foun hamutuk projetu 20 ho orsmentu hamutuk millaun $7, entaun tinan ne’e konstrui ona hitu (7) no tinan oin mak kontinua konstrui tan sira seluk,” nia dehan.
Aleinde ne’e, MS hetan apoiu osan balun husi Tailándia husi UNFPA hahú halo projetu ida-ne’ebé konstrui maternidade iha Postu Administrativu Kelikai, Munisípiu Baukau no reabilita maternidade iha Postu Administrativu Baguia, entaun projetu lubuk mak sei halo nafatin.
“Agora husi Governu Austrália liuhusi DFTA ne’ebé reabilita ba sentru saúde no postu saúde iha Ermera no RAEOA no tinan oin sei kontinua nafatin, entaun ida-ne’e apoiu husi orsamentu mai husi DFTA ne’ebé apoiu ba iha setór saúde,” nia dehan.
Jornalista : Felicidade Ximenes
Editór : Cancio Ximenes
