BOBONARU, 05 Janeiru 2026 (TATOLI) – Prezidente Autoridade munisípiu Bobonaru, Paulo Moniz Maia, louva dedikasaun Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) hodi mantein seguransa no orden públika.
Nia husu forsa seguransa sira atu hatudu komportamentu di’ak iha serbisu tomak hodi garante pás ba ema hotu-hotu.
Paulo Moniz Maia haktuir katak maski foin asume knaar durante fulan haat, maibé nia asiste rasik situasaun seguransa ne’ebé kalma to’o iha nivel postu administrativu.
Notísia relevante: PNTL Bobonaru arrekada reseita $65.186 durante 2025
“Komandante PNTL munisípiu Bobonaru, segundu komandante ho nia membru tomak kontribui maka’as, maski iha pasadu akontese situasaun balun ne’ebé ita hotu la espera, maibé ha’u haree situasaun hakmatek, tanba ne’e iha reflesaun ida-ne’e ita reflete pasadu hodi hakat ba futuru”, nia hateten iha ámbitu reflesaun Natál hamutuk ho fámilia boot Komandu Polísia munisípiu Bobonaru, ne’ebe partisipa husi komandante no membru PNTL no F-FDTL, iha Kuartél Komandu Polísia munisípiu Bobonaru, ohin.
Paulo Moniz Maia hato’o nia feliz Natál no tinan foun ba pesoál seguransa tomak no povu Bobonaru, ho esperansa katak tinan foun ne’e sei lori prosperiedade, pás, no estabilidade ba nasaun, liuliu iha Bobonaru.
Iha sorin seluk, Komandante Polísia munisípiu Bobonaru, Superintendente Xefe Agustinho Gomes da Silva, afirma katak tinan kotuk sai lisaun valioza ida kona-ba kreximentu, pasiénsia, no respeitu hodi hala’o knaar.
“Tinan nia rohan la’ós de’it kona-ba muda kalendáriu, maibé mós kona-ba hafoun ita-nia hanoin, mentalidade, karáter, no dixiplina. Ida-ne’e maka oportunidade ida atu mehi boot liután, serbisu maka’as liután, no apoia malu”, nia hateten.
Superintendenti Xefe ne’e espera katak Natál 2025 no tinan foun 2026 sei lori forsa, susesu, no dame ba pesoál seguransa no povu Bobonaru.
Notisía relevante: PNTL Bobonaru aprezenta kazu 263 ba MP, maioria krime kontrabandu
Jornalista: Sergio da Cruz
Editora: Maria Auxiliadora
