DILI, 13 Janeiru 2026 (TATOLI)-Deputadu husi Partidu Demokrátiku (PD), Mariano Malik, bolu atensaun Sekretaria Estadu ba Asuntu Toponímia no Organizasaun Urbana (SEATOU) atu kontrola sidadaun ne’ebé konstrui uma iha valeta leten ne’ebé fó impaktu ba inundasaun iha tempu udan.
Tuir fiskalizasaun iha terrenu, liuliu iha área Surikmas, Dili, bainhira iha tempu udan sempre hamosu inundasaun, tanba komunidade harii fali uma iha valeta leten no haki’ak animál hodi taka valeta.
“Tanba ne’e, husu Vise-Minstru Asuntu Parlamentár atu halo koordenasaun ho SEATOU bele bá haree, organiza hodi bele halo ordenamentu ida di’ak”, nia hato’o iha reuniaun plenária Parlamentu Nasionál, ohin.
Vise-Ministru ba Asuntu Parlamentár, Adérito Hugo da Costa, rejista preokupasaun hodi hato’o ba SEATOU atu foti medida.
Tuir dekretu-lei númeru 3/2024, loron 17 Janeiru, no alterasaun dahuluk ba dekretu-lei númeru 33/2008, loron, 27 Agostu iha artigu 6 kona-ba organizasaun, ijiene no limpeza iha fatin públiku mak hanesan labele taka bee dalan ka valeta, labele halo konstrusaun iha espasu públiku no seluk tan.
Dezde 2024, ekipa konjunta lidera husi SEATOU sobu ona konstrusaun sira lubun ne’ebé okupa espasu públiku no taka valeta.
Antes ne’e, Sekretáriu Estadu ba Asuntu Toponímia no Organizasaun Urbana (SEATOU), Germano Santa Brites Dias, hateten Governu Dasiak, liuhusi SEATOU mai ho planu no programa atu hadi’a no organiza sidade Dili tuir orden no ida-ne’e responsabilidade parte hotu nian.
Notísia relevante: https://tatoli.tl/2025/01/24/seatou-komprometidu-hadia-no-organiza-sidade-tuir-orden/
Jornalista: Nelson de Sousa
Editora: Maria Auxiliadora
