DILI, 09 Abríl (TATOLI)–Jogadór Selesaun Nasionál U-17 na’in-23 selesionadu ona husi treinadór hodi dezloka ba Indonézia iha tempu besik, atu partisipa iha ASEAN Boys Championship 2026 iha Indonézia.
Diretór Selesaun Nasionál iha Federasaun Futebol Timor-Leste (FFTL), João Maneco, hateten jogadór hirak ne’ebé treinadór hili sei tuir kompetisaun ne’e no tuir planu ekipa Timor-Leste sei kontra ekipa forte husi nasaun uma-na’in Indonézia, Malázia no Vietname.
“Iha ne’e ita-nia ekipa sei iha grupu ne’ebé maka’as uituan, tanba iha ne’ebá ita sei hamutuk ho Indonézia, Malázia no Vietname. Hanesan ita hotu hatene katak ita hamutuk ho nasaun sira-ne’ebé ninia futeból kompara ho ita-nian mais avansadu liu, maibé ida-ne’e la’ós sai difikuldade ba ita. Ita prontu ba kompete no hatudu jogu ne’ebé di’ak,” Diretór ne’e hateten ba jornalista sira iha edifisiu FFTL Dili, ohin.
Nia dehan, tuir observasaun ne’ebé FFTL halo ba selasaun U-17 ho treinadór sira halo preparativu ne’ebé di’ak durante fulan ida iha Timor-Leste liuhusi fasilidade ne’ebé FFTL rasik oferese.
“Klaru katak ita-nia treinadór sira prepara ekipa ne’e di’ak-liu hodi ba kompete. Sira prepara kuaze fulan ida liu ho fasilidade ne’ebé federasaun fornese, ne’ebé husi federasaun tau fiar tomak ba treinadór ho ekipa ne’ebé aban atu aranka ba Gresik, Jawa Timur,” nia hateten.
Iha sorin seluk, asistente treinadór U-17 Manuel da Costa Soares hateten, halo servisu lubuk ida no tais duni jogadór ne’ebé kualidade mak atu ba kompete iha eventu rejionál ne’e.
”Depois ami halo servisu lubuk ida atu hetan jogadór hamutuk 23, sira-ne’e mak ami atu lori ba tuir kompetisaun ne’e,” treinadór ne’e dehan.
Ekipa U-17 dadaun ne’e, hatudu jogu ne’ebé di’ak tanba halo ezersísiu barak ona hodi haforsa jogadór sira-nia fíziku no hetan ona esperiénsia husi jogu iha Xina.
Daudaun ne’e, tuir nia, ekipa prepara ona modelu jogu tolu (3) mak hanesan (Low Block, Middle Block no pressing attack).
Lista kompletu jogadór U-17
Guarda Rede
Joao Baptista Con Anin (Santa Cruz FC), Domingos Alfiano Maia (Centro Becora), Joelnovo Baptista Dos Santos Lopes (ASS. Bobonaro).
Defeza
Inigo Martins Fatima Braz (D.I.T FC), Jacob Salsinha Maia (Assalam FC), Forindo De Araujo Magno (Santa Cruz FC), Dramicio Augusto Moreira (Emanuel FC), Jeremias Zeus Tukan Bareto (AS Marca FC), Savany Loreiro Araujo Gomes Lay (D.I.T FC), Filomino Magno Da Silva (Nagarjo FC), Reinado Junior Veigas Galucho (Karketu Dili FC), Geovanio Frassezio Amaral Branco (Karketu Dili FC)
Mediu
Quevin Arya Da Silva Ximenes (Santa Cruz FC), Paulo Anderson Amaral Braz (Nagarjo FC), Kai Samuel Castro (Sydney Olimpic FC), Jeronimo Nono (Emmanuel FC), Jepry Simare-Marec (Coração FC)
Avansadu
Germano Junior Branco Da Silva (AD. SLB Laulara), Tmas Pawel Rutkowsky (Heidelberg United), Gaudencio Karen Luis De Jesus Lopes (Porto Taibessi FC), Manuel Reinado Sarmento Da Silva (Karketu Dili FC), Elton Geovani Gusmao Da Conceicao (ASS. Oekusi), Jyzeus Gabriel Vong F. Lay (Santa Cruz FC)
Jornalista : Hortencio Sanchez
Editór : Cancio Ximenes
