OEKUSI, 06 Maiu 2026 (TATOLI) – Diretór Diresaun Rejionál Infraestrutura (DRI) iha Rejiaun Administrativa Espesiál Oekusi Ambeno (RAEOA), Remígio Nuno Sila, informa, projetu emerjérsia 22 suspende tanba mudansa dekretu-lei númeru 02/2026, hodi hein desizaun finál husi Konsellu Administrasaun Fundu Espesiál Dezenvolvimentu (KAFED) RAEOA nian.
Notísia relevante:Governu instala sekretariadu jere fundu espesiál dezenvolvimentu iha RAEOA
Remígio Sila, esplika, projetu 22 ne’e, ezekuta iha iha 2025 ho kategória emerjénsia maioria reabilitasaun estrada, Governu deside suspende tanba alokasaun orsamentu seidauk fiksa maske hetan ona ordén serbisu.
“Iha loron 10 Marsu liubá, ekipa konjunta husi Ministériu Obra Públika hamutuk ADN,I.P, ami halo inspesaun direita ba iha projetu emerjénsia sira hotu iha Oekusi, iha hamosu karta informativu ida pendente temporaria projetu 22, hodi hein instrusaun legalidade tuir desizaun KAFED,” nia hateten ba jornalista sira iha Oekusi.
Nia esplika, razaun fundamentu husi suspende ne’e, tanba bazeia dekretu-lei númeru 02/2026, haktuir kona-ba Fundu Espesiál Dezenvolvimentu (FED), signifika orsamentu ida-ne’e iha nia konsellu rasik, ka Konsellu Fundu Espesiál Dezenvolvimentu (KAFED) RAEOA.
“Ida-ne’e desizaun tomak la’ós iha Autoridade RAEOA kona-ba pagamentu projetu hotu, la’ós hanesan antes ne’e lei númeru 3/2014, Prezidente Autoridade mak iha kompeténsia ba desizaun tomak, maibé iha mudansa alterasaun lei, entaun tenki obedese ba Governu Sentrál,” nia afirma.
Notísia relevante:MOP sei avalia lista projetu emerjénsia iha Oekusi
Nia hateten, projetu 22 ne’e simu ona ordén serbisu hodi hein kontratu definitivu ho Governu, tanba nia prosedimentu ne’e, proposta aprezenta mai husi kompañia sira, submete iha Diresaun Rejionál Infraestrutura no enkamiña ba Ajénsia Dezenvolvimentu Nasionál, Institutu Públiku (ADN,I.P) bele fortitika verifikasaun.
Maibé nia dehan, antes ne’e, projetu hirak-ne’e, sira-ne’ebé iha ona fundu rasik, balu selebra ona kontratu ho Autoridade RAEOA hodi hein de’it prosesu pagamentu, maibé presiza mós hein desizaun KAFED.
“Projetu emerjénsia 22 ne’e, maioria reabilitasaun estrada balu ponte, projetu sira-ne’e iha Pante Makasar Oésilo inklui Nítibe sorin,” nia informa.
Notísia relevante:Reabilitasaun estrada Sabén iha Oésilo atinje 12%, ‘clearing-grubbing’ konkluídu
Jornalista: Abílio Elo Nini
Editór: Rafael Ximenes de A. Belo
