Autoridade Bobonaru husu lideransa lokál mobiliza eleitór partisipa REABD Biométriku

BOBONARU, 17 Novembru 2026 (TATOLI) – Sekretáriu Autoridade Munisipál (AM) Bobonaru ba Asuntu Planeamentu no Dezenvolvimentu Integradu, Semedo Laco Costa, husu ba administradór postu administrativu neen no xefe suku sira atu intensifika mobilizasaun komunidade eleitór sira hodi atualiza sira-nia kartaun eleitorál ba sistema biométriku, antes prazu ramata iha 31 Dezembru 2026.
Semedo Laco Costa hatete katak prosesu Resensiamentu Eleitorál no Atualizasaun Baze de Dadus (REABD) Biométriku iha nivel munisipál hahú ona tinan kotuk, no agora sentru atendimentu sira loke ona iha postu administrativu neen iha munisípiu Bobonaru hodi hakbesik atendimentu ba baze.
Semedo hato’o afirmasaun ne’e tanba tuir dadus husi Sekretariadu Tékniku Administrasaun Eleitorál (STAE) munisípiu Bobonaru, dadus eleitór atualiza ba dadus biométriku foin atinje 37% husi totál eleitór 72.537 rejistadu iha eleisaun parlamentár 21 Maiu 2023.
Notísia relevante: Eleitór 24.868 iha Bobonaru atualiza ona kartaun biométriku
“Sira neʼebé ba atualiza no halo resensiamentu ne’e númeru ki’ik tebes foin pur volta 37% mak foin aktualiza baze dadus falta 63%, iha momentu ne’e, ida-ne’e hakarak hatete ba administrador postu neen, ita-boot sira mak besik liu kraik hamutuk ho xefe suku sira, komunidade katak Eleisaun Prezidensiál 2027 ne’e sé mak vota, sé mak sei kaer kartaun tuan sira sei lakon sira-nia direitu ba vota”, Semedo Laco Costa dehan iha Maliana, segunda-feira ne’e.
Nia esplika katak administradór postu administrativu no xefe suku sira iha responsabilidade importante atu informa no sensibiliza komunidade iha suku no aldeia kona-ba nesesidade atu atualiza kartaun eleitorál biométriku.
Nia mós apela ba lideransa partidu polítiku sira atu ajuda fó informasaun ba sira-nia militante no apoiadór sira hodi aproveita tempu ne’ebé sei iha atu atualiza dokumentu eleitorál.
Semedo hatete katak sidadaun sira ne’ebé seidauk atualiza kartaun to’o prazu 31 Dezembru 2026 bele hasoru problema atu ezerse sira-nia direitu eleitorál iha Eleisaun Prezidensiál 2027, tanba ne’e presiza kumpre prosesu atualizasaun tuir kalendáriu ne’ebé autoridade kompetente determina.
“Ita preokupa sira la mai ne’e, más baibain atu simu subsídiu idozu nia tuku 07 forma ona iha sede suku, más atu bá atualiza dadus de’it susar la halimar. Agora, STAE ho CNE kumpre ona sira-nia devér halo resenseamentu no atualizasaun baze dadus, maibé ida atu organiza povu ne’e xefe suku no administradór sira mak tenke lori ema sira ne’e bá trata dukumentu ne’e, se la mai ne’e to’o 2027 atu eleisaun nia ita ulun moras, tanba sira mosu mai ne’e hakarak vota”, nia dehan.
Sekretáriu munisipál ne’e aumenta katak atualizasaun dadus biométriku importante la’ós de’it ba Eleisaun Prezidensiál 2027, maibé mós ba prosesu eleitorál sira seluk, inklui eleisaun podér lokál ne’ebé bele hala’o iha futuru.
“Eleisaun podér lokál ne’e presiza númeru kartaun eleitorál biométriku ne’ebé barak. Se númeru ne’e ki’ik de’it, númeru 15 ne’e bele tun ba 13, no tun tan ba 9, karik munisípiu Bobonaru bele tama iha sistema podér lokál”, nia hatete.
Iha parte seluk, Xefe Suku Soilesu, Marito Victor da Costa, afirma katak informasaun kona-ba atualizasaun kartaun eleitorál biométriku hato’o ona ba komunidade no kontinua atualiza informasaun ba xefe aldeia sira atu mobiliza sidadaun bá sentru atendimentu iha postu administrativu.
“Agora komunidade balun hahú ona trata no atualiza sira-nia dokumentu kartaun eleitorál biométriku, para sira bele iha direitu atu partisipa iha eleisaun sira agora mai ne’e”, Marito afirma.
Prosesu REABD Biométriku ne’e kontinua hala’o iha sentru atendimentu sira iha postu administrativu neen iha munisípiu Bobonaru, ho objetivu atu atualiza baze dadus eleitorál no prepara rejistu eleitorál ba prosesu eleisaun sira iha futuru.
Enkuantu tuir dadus husi STAE, munisípiu Bobonaru iha fulan-Outubru ne’e rejista katak eleitór munisípiu Bobonaru aumenta husi rihun 74 ba rihun 77-resin, inklui eleitór foun 2.000.
Notísia relevante: STAE hakbesik atendimentu REABD biométriku ba eleitór iha Kailaku
Jornalista: Sergio da Cruz
Editora: Maria Auxiliadora

