DILI, 23 fevereiru 2024 (TATOLI)—Membru Parlamentu Nasionál (PN) liuhosi Deputadu FRETILIN, Joaquim dos Santos ‘Boraluli’, husu autoridade kompetente atu prosesa kazu hatama ai-moruk ilegál ho totál item 250 mai Timor-Leste ne’ebé deskonfia hatama hosi Farmasia Moris Foun Colmera.
Notísia Relevante: PNTL detein jerente Farmasia Moris Foun na’in tolu
“Ne’e krime. Parte kompetente tenke halo intervensaun,” Deputadu Joaquin dos Santos, hateten ba jornalista sira iha PN, sesta ne’e.
Tanba, nia dehan, ida-ne’e sei prezúdika saúde públiku no indísiu krime, nune’e parte Ministériu Públiku (MP) tenke foti inisiativa halo prosesu investigasaun.
Deputadu CNRT, Patrocínio dos Reis Fernandes, hateten Estadu iha instituisaun sira hanesan Komisaun Anti-Korrupsaun (CAC, siglá portugés, PNTL, Ministéiru Públiku presiza koordenasaun ba malu hodi haree tau matan duni ba asuntu sira-ne’e.
“Se ai-moruk tama ilegál fó prezuiju ba Estadu, hola parte iha korrupsaun, tanbasá hakarak tama ilegál. Tanba hakarak desvia hosi taxa ne’ebé atu kontribui ba Estadu, entaun ne’e labele,” nia hateten.
Nia dehan, se tama ilegál laiha kontrolu, sé mak hatene aimoruk sira-ne’e prienxe kriteria ka estandár ne’ebé sistema saúde Timor-Leste nian autoriza ka lae, nune’e ninia implikasaun ne’e boot.
“Tanba ne’e, se polísia ba atua ona ne’e parabéns ba sira-nia serbisu,” nia hateten.
Jornalista : Nelson de Sousa
Editór : Cancio Ximenes
