DILI, 13 jullu 2023 (TATOLI) – Ministru Juventude Desportu no Arte Kultura (MJDAK) Nélio Isaac Sarmento, hateten Estádiu Manatuto ne’ebé to’o agora seidauk konklui sai mós difikuldade tanba na’in ba Empreza Obrai Unipesoál Lda ne’ebé kaer obra ne’e fila ona ba mundu seluk maibé Governu sei iha alternativu seluk.
“Kona-ba Estádiu Manatuto ha’u seidauk simu relatóriu, maibé ha’u hatene katak na’in ba projetu ne’e mate ona, entaun sei iha difikuldade ba ita atu haree”, Nélio dehan ba jornalista sira iha Becora, kinta ne’e.
Nélio refere, Governu nafatin fó konfiansa ba kompaña lokál sira atu kontinua obra ne’e hodi kontribui ba dezenvolvimentu nasaun ne’e, bainhira laiha mudansa nafatin mak Governu sei foti desizaun hodi buka alternativu seluk.
“Maibé ha’u sei tur haree no estuda kona-ba problema sira ne’e hotu, kona-ba Estádiu Manatuto ita sei kontinua ka modifika fali ba buat seluk maibé ne’e desizaun ikus bainhira kompaña lokál sira kaer laiha nafatin mudansa”, nia hakotu.
Nia revela, maske na’in ba empreza ne’e lakon ona vida maibé hanesan responsável másimu sei haree hodi buka solusaun tanba iha kompaña lokál barak mak iha interese atu finaliza estádiu ne’e.
“Ha’u seidauk promete oinsa mak rezolve problema ne’e, maibé ita tenke rezolve bainhira programa Governu nian hetan ona apresiasaun hosi Parlamentu Nasionál mak foin haree fali problema Estádiu Manatuto nian ne’ebé hasoru”, nia afirma.
Governante ne’e garante katak sei koalia ho empreza balun ho objetivu atu konklui konstrusaun Estádiu Manatuto maibé empreza tenke iha seriedade no responsabilidade atu finaliza.
Rekorda katak estádiu ne’e konstrui hosi kompaña lokál Obrai Unipesoál Lda ho orsamentu Estadu ne’ebé prevee hosi fundu infraestrutura ho valór milaun $2, ne’ebé Governu konsege selu ona 60%, maibé seidauk termina, kompañia abandona iha 2016 liubá.
Tanba, haree laiha progresu, Governu deside hapara kompañia nia atividade, maibé iha 2017 to’o 2018 kompaña iha mudansa ba estrutura no Governu fó nafatin konfiansa ba kompañia atu kontinua obra to’o ohin loron.
Tuir kontratu foun ne’ebé Governu halo ho kompañia ho osan restu ne’ebé sei iha no adisionál hamutuk $600.000 mak fó ba kompañia hodi kontinua obra ne’e.
Maibé to’o dalan klaran na’in ba kompaña Obrai mate tiha no atividade paradu no Governu tenke buka dalan loke fali konkursu ba kompañia foun atu kontinua obra ne’e ho osan restu hosi millaun $2 ne’e ho 40% tanba 60% selu ona ba Kompaña Obrai maibé la konsege konklui maske aumenta tan osan hamutuk $600.000.
Jornalista: Hortencio Sanchez
Editór : Zezito Silva
