DILI, 24 Abríl 2025 (TATOLI)—Membru Koléjiu Kardeál sira-nian ne’ebé iha ona Roma hasoru malu ba Kongregasaun Jerál daruak, ne’ebé hala’o iha loron 23 fulan-Abríl lorokraik, entre tuku 17h00 no tuku 18h30 (oras lokál), iha Sala Sínodu Foun, iha Vatikanu.
Notísia Relevante: Ritu taka kaixaun Papa Francisco halo iha sesta kalan
Tuir nota ne’ebé Agência TATOLI asesu husi Mídia Vatikanu katak, Koléjiu Kardeál sira-nian aprova kalendáriu ba “Novendiali”, loron neen selebrasaun eukarístika nian iha sufrájiu Pontífise matebian nian, tuir tradisaun Kreda nian.
Enkontru ne’e hetan partisipasaun husi kardeál na’in-103 no loke ho orasaun Veni, Sancte Spiritus. Hafoin, prezente sira reza iha sufrájiu ba Papa Francisco. Durante enkontru, kardeál sira ne’ebé seidauk halo juramentu halo duni, nune’e kumpre ritu protokolu sira-ne’ebé prevee ona iha prosesu antes Konklave.
Notifikasaun ofisiál fó sai ona, ho informasaun katak misa sira sei hala’o entre loron 26 fulan-Abríl no loron 04 fulan-Maiu 2025.
Selebrasaun dahuluk sei hala’o misa funerál ba Papa Francisco, ne’ebé marka ba loron 26 fulan-Abril 2025, iha tuku 10 dadeer (oras lokál), iha santuáriu Bazílika São Pedro nian.
Iha loron hirak tuirmai sei kontinua selebrasaun sira “Novendiali” nian iha sufrájiu Santu Padre matebian nian, no selebrasaun ida-idak sei hetan partisipasaun husi grupu ekleziál oioin, hodi reflete universalidade Kreda nian no ligasaun oioin Sumo Pontífise nian ho setór sira-ne’e.
Notísia Relevante: Mate-isin Papa Francisco iha ona Bazílika Vatikana hodi sarani sira presta omenajen
Hahú hosi loron 27 fulan-Abril to’o loron 4 fulan-Maiu 2025, iha Bazílika Vatikanu nian, sei hala’o selebrasaun sira, ne’ebé prezide husi kardeál oioin, no iha loron 27 Abríl, ba funsionáriu no sarani sira, ne’ebé prezide husi Pietro Parolin.
Iha loron 28 Abríl 2025, ba Kreda Roma nian, ne’ebé prezide husi Baldassare Reina no iha loron 29 Abríl 2025, ba Kapítulu Papal sira, ne’ebé prezide husi Mauro Gambetti.
Iha loron 30 Abríl 2025, ba Kapela Papal, ne’ebé prezide husi Leonardo Sandri no iha loron 01 fulan-Maiu 2025, ba Kúria Romana, ne’ebé prezide husi Kevin Joseph Farrell.
Iha loron 02 Maiu 2025, ba Igreja Orientál sira, ne’ebé prezide husi Claudio Gugerotti. Iha loron 03 Maiu 2025, ba Institutu sira Vida Konsagrada nian, ne’ebé prezide husi Ángel Fernández Artime, no iha loron 04 Maiu 2025, ba Kapela Papal, ne’ebé prezide husi Dominique Mamberti.
Kongregasaun Jerál Kardeál sira-nian tuirmai marka ona ba Kinta, 24 Abril 2025, iha tuku 09h00 dadeer (oras lokál).
Notísia Relevante: Kandidatu forte na’in-lima atu troka Papa Francisco no tradisaun hili Papa foun
Jornalista : Hortencio Sanchez
Editór : Cancio Ximenes
