DILI, 27 Novembru 2025 (TATOLI)—Prezidente Bee Timor-Leste, Empreza Públika, Gustavo da Cruz, informa servisu melloramentu bee moos nia kobertura ba komunidade iha territóriu laran tomak atinje ona 90% no asesibilidade kanalizasaun públiku atinje 45%.
Notísia Relevante:
Nia hatutan, Timor-Leste ukun-an tinan naruk ona maibé iha servisu balun mak atinje ona no balun seidauk tanba buat hotu presiza prosesu no esforsu.
“Melloramentu bee moos seidauk atinje lolós metan PEDN 2011-2030, maibé bee nia kobertura kuazé melloradu iha territóriu. Nune’e, ita kontinua esforsu atu to’o tinan 2028 bele konklui tuir meta Governu da-sia nian,” Prezidente BTL, E,P ne’e informa ba Agência Tatoli, iha nia kna’ar fatin, ohin.
Bainhira komunidade balun ne’ebé enfrenta ba bee-moos mak BTL oferse tanke ense bee-moos ba sira hodi aguenta to’o prosesu perfurasaun bee-moos konkluidu ona.
Aleinde ne’e, BTL mós servisu hamutuk ho parseriu dezenbolvimentu internasionál sira hodi apoiu fundu ba melloramentu bee-moos.
“Signifika servisu ne’e la’ós ita mesak mak halo maibé iha mós apoiu husi ita-nia parseria sira, liuliu apoiu iha área rural,” nia hateten.
BTL kontinua halo melloramentu bee-moos ho di’ak atu garante kualidade konsumu liuhusi moderniza sistema filtrasaun bee-moos, katak bee ne’e rasik komunidade bele konsumu direta ona iha espasu públiku no la presiza atu nono tanba garantia ona iha teste liuhusi laboratóriu.
Tanba ne’e, nia dehan, sistema moderniza bee-moos ne’e sei implementa de’it iha kapitál munisípiu, hanesan foin dadauk lansa ona iha Lautein no tempu tuir mai sei lansa tan iha Same (Manufahi) inklui kapitál munisípiu sira seluk.
“Aleinde ne’e, ami mós sempre destaka ekipa tékniku hodi halo monitorizasaun ba kanalizasaun bee nomós koordena ho autoridade lokál inklui komunidade hodi tau matan ba kanalizasaun bainhira hetan estraga ruma atu informa kedas,” nia hateten.
Reprezentante komunidade iha Tasi-Tolu, Marcela dos Santos, sente kontente ho planu BTL ninian ne’ebé atu moderniza sistema bee-moos liuhusi filtrasaun, ida-ne’e bele tulun sira atu konsumu bee ne’ebé saudavél.
“Durante ne’e ami la asesu bee-moos ho di’ak tanba dalaruma bee sempre maran no loke tuir oras. Entaun bainhira bee torneira maran, ami ba buka bee posu, sosa bee iha karreta tula bee-moos no bee-moris sira seluk hodi konsumu,” nia dehan.
Tanba ne’e, nia husu nafatin ba BTL atu kontinua tau-matan ba nesesidade báziku ida-ne’e no sira sei koopera ho Governu atu halo monitorizasaun ba kanalizasaun bee-moos bainhira hetan estraga husi animál ka ema ruma mak sira sei informa direta ba parte kompetente hodi hadi’a.
Enkuantu iha tinan 2025 ne’e, BTL konsege halo ona melloramentu sistema bee-moos ba uma kain 83,204 ho totál populasaun hamutuk 476.806 iha munisípiu sira hanesan iha Ainaru ne’e totál uma kain 1.141 ho nia populasaun 9.239, Aileu totál uma kain 1.754 ho nia populasaun 6.679, Baukau totál uma- kain 4.929 ho nia populasaun 27.123m Bobonaru totál uma kain 3.923 ho nia populasaun 22.085.
Munisípiu Kovalima totál uma kain 2,726 ho nia populasaun 13.822, Dili totál uma-kain 54.688 ho nia populasaun 321.347, Ermera totál uma kain 3.409 ho nia populasaun 20.828, Lautein totál uma kain 3,052 ho nia populasaun 16.326, Likisá totál uma kain 2.250 ho nia populasaun 11.937, Manatutu totál uma-kain 1.263 ho nia populasaun 6.627, Manufahi totál uma kain 2.556 ho nia populasaun 12.994 no Vikeke totál uma kain 1.513 ho nia populasaun hamutuk 7.799.
Jornalista : Alexandra da Costa
Editór : Cancio Ximenes
