PNTL hapara provizóriu atividade hasai karreta aat estasiona iha estrada públika
DILI, 24 setembru 2022 (TATOLI)-Polísia Nasionál Timor-Leste (PNTL) liuhosi tránzitu munisípiu Dili hapara provizóriu hasai karreta aat ne’ebé estasiona iha dalam públiku.
“Ami koordena ho diresaun jerál patrimóniu Estadu, Ministériu Finansa, ita hasai karreta aat ne’ebé estasiona iha estrada públika no iha atividade ne’e ita konsege hasai karreta 11, agora atividade ne’e paradu tanba ita laiha ekipamentu pezadu atu tula karreta aat ne’e,” Komandante Tránzitu Munisipiu Dili, Inspetór Domingos Gama, ba jornalista sira hafoin akompaña ekipa polísia tránzitu no DNTT halo montajen ba sinál tránzitu iha área Tribunál Distritál Dili, Kolmera, sábadu ne’e.
Nia dehan, atividade haloot karreta ne’e paradu tanba daudaun ne’e ekipamentu pezadu hosi patrimóniu Estadu nian avaria. “Ita identifika iha fatin barak iha Dili laran karreta aat kontinua estasiona iha dalan públiku, ita hein fila-fali, karik bainhira maka ekipamentu pezadu hosi Estadu di’ak fali, entaun ita koordena ho sira nune’e ita kontinua atividade ne’e,” Domingos Gama hateten.
Komandante Tránzitu Munisípiu Dili ne’e esplika, atividade hasai karreta aat ne’ebé estasiona iha estrada públikua atu la’o rútina, entaun governu tenke kompra ekipamentu pezadu.
“Se bele governu hola ekipamentu pezadu ida ba ami, atu ita kontinua hasai karreta aat ne’ebé estasiona iha estrada públika tanba iha Dili sei barak, se lae ita labele halo buat ida. Parte ida mós hola ekipamentu pezadu ne’e hatama reseita ba Estadu tanba karreta sira-ne’ebé para viola kódigu estrada ita bele aplika multa ba sira,” nia argumenta.
Enkuantu, karreta aat ne’ebé estasiona iha estrada públika polísia tránzitu Dili lori kedas ba iha Diresaun Jerál Patrimóniu Estadu, Balide. Karreta aat ne’ebé polísia tránzitu foti, karreta balun na’in selu ona multa hodi foti fali maibé karreta balun seidauk foti kontinua rai iha fatin refere.
Jornalista : Natalino Costa
Editór : Evaristo Soares Martins
