BOBONARU, 25 Jullu 2026 (TATOLI)–Sekretáriu Estadu Asuntu Toponímia no Organizasaun Urbana, Germano Santa Brites Dias, prefere Governu halo kontrolu ba movimentu transporte tama no sai iha fronteira, liuliu husi Indonézia ne’ebé tama Timor-Leste, nune’e bele iha balansu entre nasaun rua.
Governante ne’e nota karreta boot husi Indonézia atualmente bele tama livre husi Postu Integradu Fronteira Batugade to’o Dili, maibé kareta karga husi Timor-Leste labele tama to’o Atambua tanba parte Indonézia aplika limitasaun transporte.
“Karreta Indonézia neʼebé tama konforme sira-nia hakarak, sira-nia karreta boot tama to’o Dili, ita-nia truk de’it mós labele tama to’o Atambua, sira tau tia regras ba ita, limita ita, depois sira-nia tama livre, entaun agora ita hare fali sira-nia tama mai para to’o de’it iha ne’e, ita-nia mak tenke lalin fali sasán sira ne’e, para sira-nia karreta fila bá ne’ebá, ne’e para seimbang,” Sekretáriu Estadu Germano hateten iha salaun Maria-Tapo, iha Sesta (24/07).
Tanba ne’e, Governu konsidera importante atu revee mekanizmu kontrolu hodi asegura tratamentu ekilibradu entre nasaun rua.
Notísia Relevante: Transporte tama-sai fronteira Batugadé no Salele hamutuk 25.909
Aleinde ne’e, Governu mós sei hare filafali prátika arrenda rai iha área balun hodi hatama karreta privadu bá viajen iha Atambua-Kupang.
“Situasaun ne’e presiza para kedas no sei koordena ho autoridade relevante atu buka solusaun,” nia akresenta.
Liután, parte munisípiu sei prepara orsamentu atu harii fatin estasionamentu ofisiál, nune’e bele organiza di’ak liután movimentu transporte nomós oportunidade atu munisípiu hetan reseita própria ba servisu ne’e.
“Rai iha laran ne’e ha’u rona dehan Xefe Suku balun mak fó maluk balun arrenda, hatama karreta privadu sira kuandu atu bá Atambua-Kupang. Ida-ne’e ita tenke haree no ko’alia kedas atubele hapara,” nia reforsa.
Notísia Relevante: TL no Indonézia sei Asina MoU, Loke Asesu ba Transporte Dili-Kupan Diretamente
Abitante Batugade, Luciano de Jesus, konkorda ho planu ne’e no fiar katak Governu sei aplika regra foun hodi kontrola transporte tama husi Indonezia tanba emprezáriu timoroan sira mós iha transporte no bele halo atividade ne’e.
“Durante ne’e ita timoroan hanesan pentonton loos de’it, ita iha karreta, mais halo fali serbisu seluk, la hetan osan tamba ema mak mai domina raut hotu osan ba sira-nia rai, ami hakarak agora ba oin ita tenke hanesan, sira tula mai para iha ita-nia, depois mak ita-nia tula fali ba hatun iha loja para ita hotu-hotu hetan osan hanesan, se lae ita fó oportunidade ba sira hetan osan, ita la hetan buat ida,” nia lamenta.
Sekretaria Estadu Asuntu Toponímia no Organizasaun Urbana (SEATOU) sei serbisu hamutuk ho Polísia Nasionál Timor-Leste (PNTL) inklui autoridade kompetente sira atu halo fiskalizasaun iha área fronteira, nune’e movimentu transporte bele la’o tuir lei no regulamentu ne’ebé vigora.
Jornalista : Sergio da Cruz
Editora : Julia Chatarina
