DILI, 17 novembru 2022 (TATOLI)—Prezidente Repúblika José Ramos Horta, hatetenTimor-Leste atu tama Association Of Southeasts Asian Nations (ASEAN) iha 2023 ka bele tama iha 2025 ne’e, depende ba preparasaun tanba hare iha setór hotu-hotu preparasaun la sufisiente.
“Ha’u tauk uituan atu tama iha 2023. Tanba ha’u haree kuaze setór hotu-hotu ne’e Governu nia preparasaun la sufisiente. Se ha’u mak halo avaliasaun, hosi 1 to’o 5, ha’u fó valor 3,” Prezidente Repúblika José Ramos Horta, hateten liuhosi nia intervensaun iha IV Kongressu Nasionál ho tema “Haforsa setór privadu mais kreativu, produtivu no sustentavel” iha Hotél Novu Turizmu, kinta ne’e.
Tanba, nia hateten, reuniaun ASEAN nian iha 1000 no dezde nivel working group to’o simeira iha setór hotu-hotu hosi A to’o Z ne’e, Timor-Leste tenke iha kapasidade umana atu partisipa ho dixiplina.
PR Horta haktuir, nia parte lakohi bainhira marka reuniuan ida funsionáriu sira la partisipa tanba nasau ida hakarak tama ASEAN ne’e tenke halo lobi polítika makaas.
“Tama ASEAN ha’u lakohi asesor ida laiha esperénsia tama arbiru ka tama tanba partidu. Bainhira tama ASEAN ita persiza lobi polítika makaas, lobi diplomátiku makaas,” Xefe Estadu hateten.
Notísia Relevante: Kamboja apoia Timor-Leste adere ba ASEAN
Jornalista : Osória Marques
Editór : Cancio Ximenes
