DILI, 17 janeiru 2024 (TATOLI) – Ministériu Edukasaun (ME) sei fó sai, iha fevereiru, vaga ba bolsa rekrutamentu faze dahuluk ba manorin sira iha nivel ensinu pré-eskolár no báziku hamutuk 1.500.
Diretora Nasionál Rekursu Umanu, Anita Tavares de Jesus, hatete ministériu hatuur ona mekanizmu ba bolsa refere ne’ebé ezije teste dijitál, nune’e bele iha transparánsia no seriedade ba rekrutamentu kandidatu sira.
“Ita lakohi atu iha tempu ikus mosu presepsaun balun dehan prosesu vaga ba bolsa kandidatu ne’e la transparánsia tanba iha intervensaun. Tan ne’e, iha teste ba bolsa kandidatu ne’e ita sei uza sistema elektróniku, nune’e bele iha transparánsia no seriedade ba kandidatu hotu”, Anita de Jesus hatete iha Vila Verde, ohin.
Mekanizmu ba vaga ne’e regula tuir diploma ministeriál, tanba ne’e ME sei serbisu hamutuk ho Komisaun Funsaun Públika (KFP) hodi halo prosesu ba vaga ne’e bainhra teste ne’e la’o ona bele iha duni transparánsia. “Tanba ne’e, prosesu teste ba vaga ba bolsa kandidatu ne’e sei la realiza ho sistema manuál, se la’e bele mosu irregularidade”, afirma.
Dirijente ne’e salienta katak ho teste dijitál ne’e laiha ema ruma maka halo intervensaun, tanba buat ne’ebé maka kandidatu sira prienxe iha teste ne’e ninia resposta publika kedan no sira bele hatene ninia rezultadu iha loron ne’e kedan. “Karik sira iha duni koñesimentu di’ak ba serbisu profesór nian, sira sei hatudu rezultadu ne’ebé di’ak”, espera.
Lala’ok ba bolsa kandidatu ne’e presiza aprezenta uluk lista ekipa júri kompostu husi ema na’in-neen (júri tolu no suplente tolu) ba Ministra Edukasaun, Dulce de Jesus, nune’e bele halo aprovasaun. Ekipa ne’e kompostu husi ME na’in-rua nomós KFP ida inklui suplente rua husi ME.
Bolsa ne’e Ministériu Edukasaun sei anunsia iha fevereiru ho ninia lala’ok regula ona iha diploma ministeriál númeru 82/2023, 22 dezembru, ne’ebé ko’alia kona-ba regulamentu ba rekrutamentu karreira dosente. Diploma ne’e sei orienta ekipa téknika sira atu halo prosesu ba rekrutamentu ne’e.
Prosesu administrativu hotu iha janeiru ne’e tama ona iha esforsu hotu, nune’e manorin sira ne’ebé maka atu aprezenta nia kandidatura ne’e tenke prienxe duni rekizitu hodi bele fó vantajen ba sira atubele kompete hodi hetan oportunidade ba vaga refere. Vaga ba bolsa kandidatura ne’ebé sei loke bazeia ba nesesidade kada área iha eskola sira.
“Ita sei taka sai vaga ne’e ba kada área ne’ebé falta profesór atu hanorin maka hanesan dixiplina tetun, portugués, inglés, matemátika no siénsia bazeia ba regra sira ne’ebé maka define tiha ona”, informa.
Vaga ba bolsa kandidatura ne’e ministériu sei loke fazeadamente, signifika sei fó uluk oportunidade ba profesór pré-eskolár no ensinu báziku primeiru, segundu to’o terseiru siklu de’it. Ba manorin sekundáriu jerál no tékniku vokasionál sei iha fali faze daruak.
Notísia relevante: Ministériu Edukasaun sei rezolve problema manorin sira ho bolsa kandidatu iha 2024
Jornalista: Tomé Amado
Editora: Maria Auxiliadora
