Agrikultór Nabularan presiza tratór atu fila natar ektare 10
DILI, 10 Maiu 2024 (TATOLI) – To’os-na’in sira iha suku Nabularan, postu administrativa Same-Manufahi, husu tratór ida ba Ministériu Agrikultura, Pekuária, Peska no Floresta (MAPPF) atu fila rai iha natar ektare 10 ne’ebé tinan ida-resin abandonadu.
Xefe grupu Moris Nanis, Simplício Fernandes, informa, dezde 2023, sira labele kuda hare iha natar ektare 10 ne’e, tanba sira la hetan apoiu ekipamentu atu fila rai no hand tractor ne’ebé sira simu iha tinan 11 liubá avaria ona.
“Tinan ida ho balun ona, ami la halai natar tanba ami laiha ona meiu atu fila rai hodi kuda haree”, Simplício Fernandes reitera ba Tatoli iha Same.
Antes ne’e, iha 2011 to’o 2022, produsaun haree di’ak tebes tanba iha hand tractor ida ne’ebé apoia sira hodi fila sira-nin natar, maibé iha tinan kotuk to’o agora buat hotu paradu. Tanba ne’e, grupu no membru na’in-50 solisita ba Ministériu Agrikultura atu fó tratór, nune’e sira bele fila rai hodi halai fali natar.
Tuir xefe grupu, problema ba sira mak falta de’it ekipamentu no kona-ba distribuisaun bee ba natar laiha problema, tanba durante ne’e sira simu bee husi mota Laklo no to’o agora maske atividade halai natar laiha, maibé fornesimentu bee ba natar laran kontinua iha.
Diretór-Jerál Agrikultura, Kafé no Planta Industriál, Martinho Laurentino Soares, dehan, antes ne’e, sira sosa ona tratór unidade 25 maka daudaun ne’e distribui ona ba munisípiu sira atu apoia fila rai ba natar komunidade nian, maibé ministériu iha mós planu atu sosa tan tratór unidade 25 atu disponibiliza tan ba grupu sira.
“Ita nafatin tau iha konsiderasaun ezijénsia komunidade nian, tanba ne’e nu’udar asuntu pertinente ida atu ita bele alkansa objetivu ministériu nian atu to’o 2028 ne’e atinje natar ektare rihun 50”, dehan.
Preokupasaun husi grupu Moris Nanis hanesan mós lamentasaun ne’ebé hato’o husi agrikultór sira iha munisípiu seluk. “Ne’e duni, ba futuru ministériu sei halo jestaun ruma bainhira ekipamentu tratór sira ne’e sosa ona, sei jere hodi distribui ba grupu sira”, garante.
Notísia relevante: Servisu Agrikultura Ermera menus extensionita no tratór
Jornalista: Tomé Amado
Editora: Maria Auxiliadora
