DILI, (TATOLI) – Diretór Nasionál Orsamentu Estadu, Ministériu Finansa (MF), Salomão Yoaquim hatete MF daudaun ne’e prepara esbozu ba aprezentasaun matéria iha trimestre daruak nian hodi follow up progresu ezekusaun OJE 2017.
“Agora ami prepara hela matéria balun, hein katak matéria ne’e bele hotu lalais para ami bele hato’o ba ministériu sira loron ida ka rua aprezenta matéria, ita guia sira depois aprezenta sira nia lala’ok karik iha problema aprovizionamentu, parte aprovizionamentu bele esplika, petty cash ka advance ruma ne’ebé iha difikuldade atu halo pagamentu, parte tezouru sei esplika dalan di’ak halo oinsá”, katak Salomão ba Tatoli iha edifísiu MF, horisehik.
Atividade ne’e sei hala’o iha liña ministeriál no ajénsia autónomu, instituisaun públika inklui Parlamentu Nasionál, Prezidénsia Repúblika, eseptu Zona Espesiál Ekonomia Sosiál Merkadu (ZEESM) no Empreza Públika.
Iha trimestre dahuluk MF liuliu iha Diresaun Nasionál Orsamentu Estadu foku ba oinsá mak orienta, informa kona-ba prosesu, regra atubele prepara planu no pasa informasaun ba ministériu sira.
Nune’e iha trimestre daruak nian haree fali progresu trimestre primeiru nian hodi identifika problema iha kada ministériu.
Aleinde ne’e, iha kestaun ruma refere ba lei, ekipa jurídiku haree no problema ho sistema parte IT sei esplika no iha buat balun ne’ebé presiza tulun, MF fó solusaun.
Salomão afirma ida ne’e mak knaar MF nian ne’ebé hala’o ona iha tinan-tinan hodi halo monitorizasaun orsamentu ba ministériu sira atu buka tuir bainhira iha ezekusaun hasoru problema, nune’e halo enkontru trimestrál hodi buka solusaun no fasilita iha prosesu ezekusaun ba atividade liña ministériu nian.
Jornalista: Maria Auxiliadora
Editora: Rita Almeida
