DILI, (TATOLI) – Governu liuhosi Ministériu Saúde (MS) fó hanoin nafatin ba komunidade sira iha aldeia hotu atu labarik sira bele hetan imunizasaun kompletu.
Vise Ministra Saúde, Ana Isabel Soares hateten iha loron mundiál imunizasaun ne’ebé selebra iha sentru saúde Bekora, segunda (24/4) kona-ba fó hanoin ba komunidade no halo workshop siéntifika iha eskola sira.
“Fó hanoin nafatin informasaun ba ema hotu liuhosi atividade tama aldeia no halo semináriu sientífiku atu públiku bele rona informasaun kona-ba imunizasaun”, hateten nia.
Tuir nia, imunizasaun mundiál atu fó hanoin ba ema hotu atu lori oan sira ba halo vasina, nune’e bele hadook-án hosi moras oioin.
Entretantu, Prezidente Autoridade Munisipál Dili, Gaspar Soares dehan, importánsia ba programa imunizasaun atu hadi’a kualidade imunizasaun ba labarik sira, nune’e bele prevene moras oioin hanesan tuberculose no seluk tan.
“Hadomi ita nia oan sira atu hakbesik-án ba sentru saúde, kuandu sira la-prejensa, profesionál saúde sira tenke tuir ba ida-idak nia fatin atu fó atendimentu imunizasaun”, dehan Prezidente Autoridade.
Jornalista: Zezito Silva
Editora: Rita Almeida
