DILI, (TATOLI) – Problema ba konstrusaun Eskola Téknika Vokasionál (ETV), Atauro, mak rai tanba hetan impedimentu husi rai na’in.
“Fofoun laiha problema, Ministériu Edukasaun halo kontratu ho emprezáriu atu hahú serbisu, ikus mai reklama fali la konkorda”, hateten Vise-ministru Edukasaun II, Abel Ximenes iha Ministériu Edukasaun, Vilaverde, segunda (24/4).
Nia hatutan, depois buka fali solusaun, administradór postu Ataúro, autoridade munisípiu Díli, edukasaun ba rezolve, dehan bele. Emprezáriu to’o tiha ne’ebá, hahú ona serbisu dehan labele, la’ós falta orsamentu.
“Maibé foin dadauk diretór jerál ba ona ne’ebá, sira buka ona provizoriamente funsiona iha fasilidade seluk”, haktuir. “Planu dezeñu, orsamentu iha”.
Entretantu, kona-ba preokupasaun ró atu ba prátika, vise-ministru ne’e espera katak sei to’o mai iha tinan ida ne’e.
“Ha’u rona ona dehan iha ona dalan atu to’o iha tinan ida ne’e tanba ró ne’e halo iha li’ur. Portantu, ita hotu espera katak tinan ida ne’e ita bele iha ró”, katak.
Atu konklui nia informa Eskola Téknika Vokasionál (ETV), Atauro, Díli, ne’e tama iha eskola ne’ebé ita harii iha 2015.
Jornalista: Rafy Belo
Editora: Rita Almeida
