DILI, (TATOLI) – Asosiasaun Akadémika Estudantil (AAE), Fakuldade Siénsia Sosiál (FSS), Universidade Nasionál Timor Lorosa’e (UNTL), kuarta, (26/4) iha kampus FSS organiza debate sientífiku entre estudante husi departamentu neen hodi hakle’an no hasa’e ekselénsia produtividade.
Vise-Dekanu FSS, Camilo Ximenes hateten debate ne’e importante no presiza kontinua iha prosesu aprendizajen.
Debate akadémiku la’ós kompetisaun hodi determina semak manan ka lakon maibé prosesu aprendizajen. “Ita la ko’alia semak manan no lakon maibé ita hakarak koko atu hanorin, hatudu buat ruma ne’ebé iha ba malu”, hatete ba estudante perante atividade ne’e la’o.
Estudante sira bainhira hakotu estudu la’ós reprezenta de’it nia aan maibé almamater universidade nian.
“Ami profesór sira sempre obriga imi (estudante) hodi sai estudante ne’ebé di’ak. Ami labele haruka ema ne’ebé sai, ema ko’alia oituan monu ona”, katak.
Estudante sira dalaruma bele hirus no preokupa. Maibé nu’udar profesór iha responsabilidade atu halo estudante sira sai ema ne’ebé di’ak iha futuru no depende nafatin lialoos tuir prinsípiu akadémiku nian.
Bainhira ita depende lialoos, ema barak ‘dalaruma’ la gosta ita, maibé bainhira moris ko’alia no hakilar nafatin kona-ba lialoos. “Ne’e mak dehan katak defende lialoos”, salienta.
Interasaun ne’e entre profesór no estudante, nu’udar profesór prontu firmi no koko husi estudante sira tanba profesór molok hanorin nia mós hasoru ona situasaun hanesan. Estudante no profesór krítika, fó argumentu ba malu ne’e di’ak. “Ne’e normál iha mundu akadémiku”, tenik.
Atu konklui nia enkoraja estudante sira katak tenke iha vontade estuda, la’ós iha sala laran de’it maibé mós iha li’ur liuhusi debate no halo argumentu ne’ebé mak di’ak.
Alumni FSS ne’ebé sai mós ekipa juri, José da Silva Ramalho afirma, lakon ka manan la’ós kestaun ba estudante universitáriu importante mak komprende konseitu debate no iha komprensaun hodi sai estudante ne’ebé maduru no la pasivu iha kualker situasaun tanba situasaun ohin depende ba asaun estudante.
Timor-Leste atu lori ba ne’ebé la sees mós husi papel estudante nian tanba labele halo lakon kultura FSS. “Debate asuntu saida de’it FSS presiza mós sai xave ida ba susesu”, sujere.
Nia reforsa, atu sai estudante ba transformasaun sosiedade ida maduru estudante tenke estuda hodi sita liafuan revolusionáriu Cubano, Ernesto “Che Guevara” katak vitória ema nian la’ós sukat iha tinan ida, rua ka tolu nian maibé vitória ema nian mak brani foti espasu hodi la’o.
Entretantu estudante sira ne’ebé partisipa iha debate ne’e maioria mai husi semester dahuluk no datoluk.
Ekipa juri kompostu husi Frumencio Araújo, Inocêncio Xavier do Amaral, José da Silva Ramalho no Geronimo Tilman.
Jornalista: Rafy Belo
Editora: Rita Almeida
