DILI, (TATOLI) – Governu Timor-Leste (TL) liliu Ministériu Planeamentu Investimentu Estratéjiku (MPIE) liuhusi FDCH (Fundo Desenvolvimento Desenvolvimento Capital Humano), ohin asina kontratu no halo kompromisu ho bolseiru veteranu nian oan na’in 52 hodi ba estuda iha Universidade Udayana, (UNUD), Bali no Institut Teknologi Sepuluh Nopember (ITS), Surabaya, Indonézia.
Asina kontratu entre MPIE ho bolseiru na’in 42 ihá área enjeñaria no na’in sanulu iha área medisina veterinária nu’udar kontraeante daruak. Asinatura ne’e inan-aman sira mak sai sasin rasik inklui reprezentante governu na’in ida, iha salaun Ministériu Defeza, Fatuhada, Díli.
“Iha ne’ebá ko’alia kona-ba direitu, dever no responsabilidade no sansaun ba bolseiru sira”, Sekretáriu Ezekutivu FDCH, Isménio Martins informa.
Nia dehan tan: “Signifika sira iha direitu atu eskola maibé sira ne’ebé mak dezempeñu valór akadémiku tuir kritériu universidade nian”.
Bainhira hala’o estudu kada semestre, bolseiru sira nia notas, bolseiru no universidade sei entrega ba FDCH no sei entrega mós ba inan-aman sira hodi hatene bolseiru sira-nia dezempeñu akadémiku no progresu estudu.
Bainhira bolseiru ida nia aproveitamentu la di´ak governu sei fó sansaun no hapara nia kontratu. “Governu sei avalia durante tinan rua, kuandu la di’ak ita sei hapara sira-nia bolsa”, haktuir.
Bolseiru sira ne’e sei determina estudu tuir tempu ne’ebé determinadu husi governu no universidade. Orsamentu ba sira governu mak sei responsabiliza tomak. “Ba bolseiru 52, ita iha purvolta sem mil ba tinan ida ne’e, atu bele selu sira nia kustu”, informa.
Ba bolseiru sira nia sujere hatudu responsabilidade nu’udar timoroan, manten disiplina iha universidade, iha ema nia ambiente no iha ema nia rain. “Tuir lei ne’ebé vigora”, salienta.
Reprezentante Bolseiru, Elma Guterres lori bolseiru sira nia naran agradese ba governu tan fó ona oportunidade ba sira hodi estuda. Nune’e sira garante katak sei termina estudu ho susesu tuir tempu ne’ebé determinadu.
“Hodi bele kontribui ba dezenvolvimentu rai doben Timor-Leste”, hateten bolseira medisina veterinária ne’e. “Ami sei finaliza estudu tuir tempu ne’ebé determina no ho valór di’ak”.
Bolseiru ba UNUD sei desloka iha sábadu (29/4) no bolseiru ba ITS sei dezloka iha sesta (5/5) akompaña direta husi membru Konsellu Administrasaun MPIE, atuál Ministru Edukasaun, António da Conceição.
Jornalista: Rafy Belo
Editora: Rita Almeida
